USA-mi præsidentinngortussap Donald Trumpip ernerata Donald Trump Juniorip sapaatit akunnerata massuma ingerlanerani nunatsinniinnerani innuttaasunit tikilluaqquneqarnera Trumpip qujassuteqarfigaa.

Donald Trumpip nammineq inoqatinut attaveqaqatigiittarfiutimini 'Truth Socialimi' taama allappoq.

- - Kalaallit Nunaanni innuttaasunut qujanaq, ernera Donald Trump Jr. angalaqataalu allat taama inussiarnisaarfigitigigassigit, Takoqqingajalerpugut! Trump allappoq. 

Præsidentinngortussaq aamma nunatsinnut tikeraarnissamut pilersaaruteqarnersoq, qaqugulu tamanna pissanersoq, oqaatigineqanngilaq.

Kalaallit Nunaannik Panamallu ikerasaanik aqutsilerusulluni pinngitsaaliiniarnermini, sakkutuulersornissaq aningaasarsiornerluunniit atorsinnaanerlugit Donald Trumpip tusagassiortunik marlunngormat katersortitsinermini naaggaarusunngilaa.

Trumpip ernerata Donald Trump Jr.-ip nunatsinnut tikeraarnerata ulluani Trump taama oqarpoq.

Danmarkimi naalakkersuisut præsidentinngortussamut Trumpimut saaffiginnissimasut, Danmarkimi ministeriunerup Mette Frederiksenip oqaatigaa:

- Oqaloqatigiinnissarput siunnersuutigaarput. Itigartinneqanngilagut. Præsidentinngortussarli præsidentitut ivertinneqareerpat aatsaat tamanna piviusunngussasoq ilimagaara, Mette Frederiksen oqarpoq.