Erik Jensen: Siumut uuliasiorusuppoq
Nunatsinni uuliasiortoqaleqqinnissaa ammaffigineqartariaqarpoq. Siumup siulittaasua, Erik Jensen, taama isumaqarpoq.
- Ikummatissanik imaluunniit aatsitassanik qaqutigoortunik, saffiugassanik qaqutigoortunik, nunarput pisuussuteqarpoq aningaasarsiorfiginerusariaqakkaminik, Erik Jensen KNR-mut oqarpoq.
Tassalu tamanna qinersiviup maanna atuuttup aallartinnerani Naalakkersuisuusut, Inuit Ataqatigiit Naleqqallu aalajangernerisa akerleraa.
Taakkuami Kalaallit Nunaanni uuliasiortoqaqqissanngitsoq 2021-imi aasaangaa aalajangerput. Silap pisussaata allanngoriartorneranik ajornartorsiut Naalakkersuisunit ilungersunartutut isigineqarmat taama aalajangernermut tunngavilersuutinut ilaavoq.
- Siunissaq uuliamiinngilaq. Nukissiaq ataavartoq siunissaavoq, tassanilu iluaqutissavut amerlanerujussuupput, Taamani Naalakkersuisut allapput.
Tamannali qinersereernerup kingorna taamaattuaannartariaqanngitsoq, Erik Jensen isumaqarpoq:
- Siumup anguniartuartarpaa immitsinnut napatilernissatta qalakkeerneqarnissaa. Aningaasarsiornikkut siuariartornissatta pisuussutigut uumaatsut uumassusillillu atorluarneqarnissaat, taanna oqarpoq.
Naassaanngitsumik aalajangernerunngitsoq
Taamali aalajangerneq nunatsinni partiit anginersaannik, qinersinermi kingusinnerpaamik upernaaru pisussami, allannguiffiussagaluarpat atuukkunnaariaannaavoq.
- Immitsinnut napatilernissarput allanullu kalunnersuit, taama taaneqartartut, taakkua isumalluutit peeriartuaarneqarnissaat, pingaartitatta ilangilluinnarmassuk, partiip siulittaasua oqarpoq.
Uuliasiortoqannginnissaanik aalajangerneq naassaanngitsumik atuuttunngitsoq Erik Jensen erseqqissaavoq.
- Uuliasiornissamut taanna anguniagaq unitsikkallarneqarnikuuvoq qinersiviup aallartisimalaalernerani, naalakkersuisooqatigiit pilersaarummik unitsikkallarnikuuaat. Taannalu isumaqanngilaq naassaanngitsumik inatsit atuuttoq, taanna oqarpoq.
Partiip anguniagaa
Siumut nuna tamakkerlugu 2023-imi ataatsimeersuarpoq. Siumullu anguniagai ataatsimeersuarnermi taamani aalajangerneqartut naapertorlugit uuliasiorneq mattunneqassanngilaq.
Uuliasiortoqassappalli tamassuma avatangiisinut inunnullu ajoqusiisinnaanissaa aarlerinassanngilaq.
- Piumasaqaatit qaffasissut naammassineqarsimanissaat soorunami pingaarnerpaajussaaq Erik Jensen oqarpoq.
