Naalakkersuisut: Nunatsinni uuliasiorneq unittariaqarpoq

Nunatsinni uuliasiorumaneq unittariaqarpoq, Naalakkersuisut taama nalunaaruteqarput.

Naalakkersuisut tusagassiutinut nalunaarumminni erseqqissaatigaat; nunatsinni maanna uuliasiornermik misissuinerit unissasut.

Taama aalajangernerminnut tunngavilersuutigaat pinngortitap, piniagassat aammalu aalisarnerup mingutserneqannginnissaat pingaartikkamikku, Naalakkersuisut taama isummerput isumaqaramik tamatumunnga taarsiullugu nukissiuteqarneq inerisarneqarsinnaasoq, soorlu assersuutigalugu erngup nukinga atorlugu nukissiorfiliornerit matumani eqqarsaatigalugit.

Aatsitassanut Naalakkersuisoq Naaja Nathanielsen tusagassiutinut nalunaarummi erseqqissaavoq, uuliasiortoqaraluarpat pinngortitamut mingutsitsinerujussuarmik tamanna kinguneqarujussuarsinnaasoq.

- Nunami issittumi najukkatsinni mianernartumilu mingutitsisoqannginnissaa akisussaaqataaffigaarput oqarpoq. Uuliasiorumalluta takorluuinitsinnut nukiit atukkavut allanut inuussutissarsiutinut takorluuinermut atortariaqarpagut, Naaja Nathanielsen oqarpoq.

Uuliasiornissamut iliuusissiaq sapangipparput

Uuliasiornissamut iliuusissiaq Siumukkut Naalakkersuisuunerisa nalaanni siuttuuffigineqarsimagaluartoq maanna IA-p Naleqqallu atorunnaarsippaat 

Uuliasiornissamut iliuusissiaq ukiuni sisamani atuuttussatut naatsorsuutigineqartoq siullermik 2020-p aallartinnerani saqqummiunneqaqqaarpoq, siunertaasimagaluarporlu nunatsinni uuliasiortoqarnissaanut soqutiginninneq pilersinneqarumaartoq.

AAMMA ATUARUK Periusissiaq nutaaq nunatsinni uuliasiornissamut soqutiginnilersitseqqissasoq

 Tamanna ilaatigut isumaqarluni, nunatsinni sumiiffiit uuliasiorfissatut piukkunnartut arlallit ammaanneqassasut, soorlu ilaatigut Davis Strædep nalaa aammalu Baffinip kangerliumarnga.

Uuliasiornissamut iliuusissiaq taamanikkut Inuit ataqatigiinnut Naleqqamullu qularnartoqarsimavoq, taamanikkummi taakku naalakkersuisunut illuatungiliuttuupput.

Partiillu taakku marluk, marsimi qinersisoqareernerata kingorna pissaaneq tiguaat taamaalillutillu uuliasiornissamut pilersaarutaasimagaluartumut maanna mattussipput.

- Siunissaq uuliasiornermiinngilaq. Siunissaq nukissiuutiniippoq, tassungalu tunngatillugu tassuunakkut ajugaanerusinnaavugut, ilaatigut taama tusagassiutinut nalunaarummi Naalakkersuisut allapput.