Sulisitsisut: Erik Jensen imminut assortorpoq
Aalisarnermut Naalakkersuisup, Erik Jensenip aalisarnermi inuussutissarsiuteqarnermut susassaqartut aalisarnermut inatsip nutaap pitsanngorsarnissaanut atatillugu ataatsimeeqatigisimallugit marlunngornermi nalunaarutigaa.
Tamannalu ilutigalugu Naalakkersuisut aalisarnermut inatsisissatut siunnersuut nutaaq 2017-imi ukiakkut ataatsimiinnermi saqqummiunneqartoq attatiinnassagaat erseqqissaatigalugu, tamanna Sulisitsisut Erik Jensenip ataasinngornermi ataatsimeeqatigisaasa ajuusaarutigaat:
- Imminnut ataqatigiinngillat, Naalakkersuisoqarfiup tusagassiutitigut nalunaarutaanni inatsimmut uparuaatit tusarumaneqassasut unnersimanera, illuatungaatigullu nalunaaruteqarneq inatsisissatut siunnersuut allannguuteqanngitsumik saqqummiunneqaqqissasoq. Taamatut ilisumik ataatsimeeqateqarneq siammasissumik isumaqatigiissuteqarnissamik siunertaqarani ilisimatitsissuteqarneruinnartutut isikkoqarpoq, Sulisitsisut pisortaat, Brian Buus Pedersen tusagassiuutinut allappoq.
AAMMA ATUARUK Aalisarneq pillugu inatsisissap suliarineqarnera nanginneqassasoq
Siunnersuut akerleriiffiusoq
Aalisarnermut inatsisissatut siunnersuut ukiaq oqallissutaangaatsiarpoq, upernaarlu qineqqusaartoqarnerani sammineqangaatsiarluni. Siunnersuullu ilaatigut akerleriiffiuvoq, umiarsuaateqarfissummi ilaat inatsit atuutilissagaluarpat Namminersorlutik Oqartussat milliardilinnik taarsiissuteqartinniarnissaannik siorasaaripput.
Raajartassiissutinik tunuartitsinissamut malittarisassanik allannguinissamik siunnersuuteqartoqarnera isumaqatigiinngissutaavoq.
Inatsillu nunatta karsiata isertitaani nunattalu tunisaasa ataatsimut nalinginik appartoqartitsisinnaasoq Naalakkersuisut namminneq naatsorsuinerisa takutippaat.
Aalisarnermi illutungerisat akuutinneratigut nutaamik suliaqartoqarnissaat Sulisitsisut kaammattuutigaat:
- Inatsisartunut kaammattuutigiumavarput Naalakkersuisut inatsimmik suliarititsiniarnera itigarteqqullugu, pisariaqartumik sioqqutsisumik suliarisariaqartut naammassineqarnissaasa tungaanut, Brian Buus Pedersen allappoq.
