Erik Jensen ilorrisimaarani uparuaasoq: Royal Greenlandip ataatsimoorneq eqqaamassavaa
Umiarsuaatileqatigiiffiup avammut assartuinerup akii februaarip aqqarnanit 32 procentimik qaffassasut nalunaarutigereeraalu nunatsinni inuussutissarsiorfiit ilarujussuisa naalakkersuisut Royal Arctic Linelu (RAL) tamanut saqqumisumik isornartorsiorpaat.
Aalajangiineq naalakkersuisunit akuerisaavoq, akuersunngitsumillu qisuariarneq ineqarnermut attaveqaasersuutinullu Naalakkersuisoq, Erik Jensen (Siumut) aalajangernermut pingaaruteqartumut qulalersinngilaa.
AAMMA ATUARUK RAL aningaasat naaleerukkiartorneranit eqqqugaasoq: Nunatta avataanut assartuineq 32 procentimik akitsortoq
- Suliffeqarfiit akiliinissaat salliutipparput. Taakku ukiuni arlalinni akikitsumik nassiussisarnikuupput. Innuttaasut nalinginnaasut eqqorusunngilagut, aamma isumaqarpugut suliffeqarfiit nunatsinnik ineriartortitseqataassasut, taanna KNR-imut oqarpoq.
Royal Greenland akiligassamik aalisartunut inissiissappata ernumanartoq
Royal Greenland, ukiut tamaasa aalisakkanik qalerualinnillu tonsikkaanik RAL-ip containerinik assartuissutaanik nassitsisartoq akit qaffannerannik isornartorsiuinerpaat ilagaat.
Aalisakkerivissuaq kiffartuunneqarnermut tassunga 32 procentimik tassa millioninik arlalinnik ukiumut akiliuteqarnerulertussaavoq.
Royal Greenland KNR-imit apersorneqarumanngilaq, nittartakkatigulli tusagassiorfimmit, Sermitsiaq.AG-imit apersorneqarnerminnut innersuussuteqarpoq.
Umiarsuaatileqatigiiffiup RAL-ip aningaasat naleerukkiartornerannit eqqugaanermini nunatta avataanut assartuinermut akigititani 32 procentimik qaffappai.
Naalakkersuisut RAL-ip akigititaminik februaarip aqqarnani qaffaaniarneranik akuersereerput, tamannali Sulisitsisunit isornartorsiorneqarpoq, isumaqaramimmi tamanna aalisakkanik nioqqutissiortunut avammut tunisat 93 procentiinik nioqquteqartartuusunut tussasoq.
- Suliffeqarfinnut inuiaqatigiinnullu qanoq sunniuteqartigissanersoq soorunami ernummatiginerpaavarput, Sulisitsisut pisortaat Christian Keldsen oqarpoq.
Royal Greenlandip pisortaanerigallagaata, Nils Kinnerupip akit qaffanneri aalisartunut eqquissasoq oqaatigaa, Royal Greenlandimmi atuisartui aalisakkanut qalerualinnullu akiliinerulissappata tamanna unammillersinnaaneranut aseruissammat.
- Nioqqutissaatigut akitsortissinnaanngilagut, taamaalioruttami nunat tamalaat akornanni tunisinnaanavianngilagut. Akinik qaffaanermut akit tunitsivinni akinit aningaasartuutiniillu taamaallaat aasinnaavagut, Nils Kinnerup Sermitsiaq.AG-mut oqarpoq.
Erik Jensenip Royal Greenlandimit qisuariarneq nuannaarutiginngilaa – killormuuanilli.
- Isumaqarpunga Royal Greenlandip akiligassamik aalisartunut nassiussiniarluni aalajangernera uggornartorujussuusoq. Suliffeqarfiup inuiaqatigiinnit pigineqartup taama aalajangiinera akuerisinnaanngilara.
RAL: Akit appasitsissinnaanngilagut
Royal Greenland Sermitsiaq.AG-mit apersorneqarnermini RAL-imut sakkortuumik aamma isornartorsiuivoq, RAL-ilu taama annertutigisumik tassanngaannartumillu assartuinermut akinik qaffaasariaqarnermut ingerlatsinerlunnerarlugu oqaatigalugu.
RAL-imi pisortap, Niels Clemensenip assartuinermut akit politikkikkut kissaateqarneq pissutigalugu ukiuni arfineq-pingasuni nikisinneqarsimanngitsut oqaatigaa. Tamanna nunatsinni nunarsuullu sinnerani aningaasaqarnerup ingerlalluarnera pissutigalugu periarfissaasimavoq.
AAMMA ATUARUK KNAPK nunatta avataanut assartuinermik akitsuinermut: Aalisartut aningaasanik aallerfiginiarunnaarniarsigit
Pissutsit maanna allaanerugallarput. Nunarsuarmi aningaasaqarneq appariartorpoq, aningaasallu naleerukkiartorlutik.
Tamanna RAL-ip ilaatigut containerinik attartorneranut, sillimmatissanik pisiortorneranut ilaatigut akisunerulertitsivoq, tamatumalu saniatigut nunatta Danmarkillu akornanni nioqqutissanik ikinnerusunik assartuisoqartalerluni.
Niels Clemensenip oqarnera naapertorlugu taamaammat umiarsuaatileqatigiiffiup aningaasaqarnerani ataqatigiittoqassappat assartuinermut akit qaffannissaat pisariaqarpoq.
- Akinik qaffaanerup aningaasartuutigut matussusissavai. Umiarsuarnut nutaanut umiarsualivimmilu atortorissaarutinut ukiuni kingullerni aningaasaliivugut, taamaammallu akiligassanik ernianillu akilersuissalluta. Aningaaserivik akiliisinnaassusitsinnut piumasaqaateqangaatsiarpoq, siunissamullu qularnartumut sillimassalluta, taanna oqarpoq.
Royal Arctic Line 1993-imili nunatsinnit nunatsinnullu assartugassalerinermi 1993-imili kisermaassilerpoq. Umiarsuaatileqatigiiffik Namminersorlutik Oqartussanit 100 procentimik pigineqarpoq.
Assi: KNR/Anton Gundersen Lihn.
Aalisartut suliffeqarfiit marluk akornanni pilliutaasut
Naalakkersuisut piffissami aggersumi ajornakusoortunik ataatsimiinnissaat Erik Jensenip KNR-imut isertuutinngilaa, taakkunanilu aalisartut Namminersorlutik Oqartussat suliffeqarfiutaasa angisuut marluk isumaqatigiinnginneranni pilliutigineqannginnissaannut aaqqiissutissarsiortoqassaaq.
- Tamanna tusagassiuutitigut ingerlanneqassanngilaq. Naalakkersuisut siulittaasuata (Múte B. Egedep aaqq.) suliffeqarfiillu oqaloqatiginissaat alloriarnissap tulleraa, aalisartummi akiligassanik nassitsiviginiarneqarnera isumaqatiginngilara. Ingerlannera ajornakusoorluinnassaaq, Erik Jensen oqarpoq.
Erik Jensenip oqarnera naapertorlugu assartuinermut akit nutaat qanoq sivisutigisumik atuutissanerat siulittoruminaappoq. Nunarsuarmimi aningaasaqarnerup qanoq ingerlanera apeqqutaalluinnarpoq.
