KNAPK nunatta avataanut assartuinermik akitsuinermut: Aalisartut aningaasanik aallerfiginiarunnaarniarsigit
Nunarsuaq tamakkerlugu aningaasaqarnerup ukiumi kingullermi kipiluttunarsinerani aningaasat naleerukkiartorneranni sorpassuarnik akitsuipiloortoqarmat inuit suliffeqarfiillu tamaviaarput.
Royal Arctic Linep avammut assartukkaminut akigititaminik 32 procentimik februaarip aqqarnaniit qaffaasussanngorneranik tamanna kinguneqarpoq.
Kalaallit Nunaanni Aalisartut Piniartullu Kattuffiatali, KNAPK-p, tamanna isornartorsiorpaa.
AAMMA ATUARUK RAL aningaasat naaleerukkiartorneranit eqqqugaasoq: Nunatta avataanut assartuineq 32 procentimik akitsortoq
Umiarsuaatileqatigiiffiup RAL-ip aningaasat naleerukkiartornerannit eqqugaanermini nunatta avataanut assartuinermut akigititani 32 procentimik qaffappai.
Naalakkersuisut RAL-ip akigititaminik februaarip aqqarnani qaffaaniarneranik akuersereerput, tamannali Sulisitsisunit isornartorsiorneqarpoq, isumaqaramimmi tamanna aalisakkanik nioqqutissiortunut avammut tunisat 93 procentiinik nioqquteqartartuusunut tussasoq.
- Suliffeqarfinnut inuiaqatigiinnullu qanoq sunniuteqartigissanersoq soorunami ernummatiginerpaavarput, Sulisitsisut pisortaat Christian Keldsen oqarpoq.
KNAPK KNR-imut ima oqarpoq:
- Avammut assartuineq akitsorpat suliffeqarfissuit aalisakkanik nunamut allamut nioqqutillit aamma aningaasartuuteqarnerulissapput. Tamanna sinerissap qanittuani aalisartunut tussaaq, tulaassamik akigissaartinneqarnerunissaannik ajornartorsiulissagamik.
KNAPK-p siulittaasuata Nikkulaat Jeremiassenip oqarnera naapertorlugu inuussutissat uuliallu akitsoriartuinnarmata sinerissap qanittuani aalisartut aningaasat naleerukkiartornerannit eqqugaareeqaat.
Naalakkersuisut ilungersuanarnerannik miserratiginnittut
Naalakkersuisut aalisartut qanoq ilungersuatiginerannik miserratiginnittut
KNAPK-p Naalakkersuisut sinerissap qanittuani aalisartut aningaasaqarnikkut ilungersuajunnaarnissaannut iliuuseqalertoriaqalersoralugillu aaqqiisariaqalersorai:
- Sinerissap qanittuani aalisartut ipitinneqassanngippata, taava Naalakkersuisut ajornartoornerup nalaani immikkut ittumik ikiorsiinissaat pisariaqarpoq. Pisortat aalisartut atuisullu aningaasat naleerukkiartornerannit eqqugaaneranni sunngitsuusaaginnarsinnaanngillat, Nikkulaat Jeremiassen tusagassiuutinut nalunaarpoq.
KNAPK aalisartut aningaasaqarnikkut ilungersuajunnaarnissaannut iluaqutaasussatut suliniutaasinnaasunik siunnersuuteqarpoq.
Sinerissap qanittuani aalisartut ikummatissamut aningaasartuutinut ikiorserneqassasut, aalisartut piniartullu kattuffiat ilaatigut isumaqarpoq. Tunitsivinni aalisakkat akisunerusumik akilertassagaat aamma oqaatigaat.
Erik Jensen: Royal Greenlandip qisuariaataa akueriuminaappoq
KNAPK-p avammut tunisinermi akit qaffappata akiligassartaa aalisartunut akiligassanngorsinnaanera ernumassutigigaa Royal Greenlandip pisortaanerigallagaata, Nils Kinnerupip Sermitsiaq.AG-mut uppernarsarpaa.
Oqaatigineqartorlu ineqarnermut attaveqaasersuutinullu naalakkersuisup, Erik Jensenip (Siumut) aalassassutigaa.
- Sooruna ajuusaarutigivara, uggorivara aalisartut uani sallunaaveeqqutitulluunniit inissinniarneqarnerat maluginiarakku. Isumaqarpunga aalisartut taamannak akiligassamik nassitsiviginiarnerannik oqariartorneq imaannaanngitsoq uggornartuusorlu, taamaattumillu ingerlatseqatigiiffik inuiaqatigiit pigisaat taamatut iliuuseqarniartoq akuerinngilluinnarlugu oqaatigissavara. Taamaattumillu Naalakkersuisut siulittaasuat aamma oqaloqatigivara, taakkua aaqqiivigineqarnissaat taamatullu suaaruteqarnerat isumaqatiginnginnakku, Erik Jensen KNR-imut oqarpoq.
