IMAK-ip siulittaasua: Efterskolit pillugit oqallinnermi oqaatsit akulerunnagit
- Maluginiarparput oqaatsit annertuumik eqqartorneqartut, isumaqarpugulli oqallinneq allamut saatinneqassasoq. IMAK-ip siulittaasua Karl Frederik Danielsen KNR-imut taama oqarpoq.
Taama iliorpoq Kalaallit Illuutaasa Danmarkimilu Efterskolet kattuffiata uparuarmassuk kalaallit amerlavallaat efterskoleni taamaatiinnartarnerat oqaatsinik aallaaveqartoq.
Tamannali IMAK-ip siulittaasuata kukkusumik inerniliinerusoraa.
Danskit efterskoleniit kalaallit tallimaangaangasa ataaseq taamaatiinnartartoq, Nunatsinni efterskolenit maannamut marluusunit pingasuungaangasa ataaseq taamaatiinnartartoq.
Tamatuma ersersippaa oqaatsit ajornartorsiutaanngitsut, allanilli inuuniarnikkut ajornartorsiutinik tunngaveqartut.
Ilinniartitsisut akisussaaqataasut
Atuartup Danmarkimi efterskoleriarnissamut piareersimanissaanut meeqqat atuarfiat pisooqataasoq Karl Frederik Danielsenip nassuerutigaa.
- Nassuerutigisariaqarparput inersimasuusugut Kalaallit Nunaanni tamatta atuarfimmut akisussaaqataagatta. Uagullu ilinniartitsisuusugut aamma tamatumunnga akisussaaqataalluta.
Atuarfiulli kisimi atuartoq unissarsinnaanngilaa. Atuanngikulasimagaluarpalluunniit atuartoq efterskoleriarnissaanit unitsissinnaanagu. Taamaattumik inuiaqatigiinni arlaqarnerusut akuleruttariaqartut Karl Frederik Danielsen isumaqarpoq.
- Atuanngikulasoq arlaannit unitsinneqartariaqarpoq. Tassani kalaallit tamarmik akisussaaqataapput. Politikerit, ilinniartitsisut, angajoqqaat allalluunniit ilinniartumut attuumassutillit piffissaatillugu iliuuseqartariaqarput.
Kalaallinut efterskoleni atuartunut suliniutissatut siunnersuutit
- Atuartup suliaanut, inuttaanut, inuuniarnikkullu piginnaasaanut Danmarkimi efterskolet ilaatigut atuarfimmit oqaaseqaatit aqqutigalugit paasisimasaqarnerusariaqarput.
- Danmarkimi efterskolertunut Suliniutip kalaallit ilinniaqqiffissami piumasaqaataat aallaavigalugit nunatsinni danmarkimiluunniit misilitsinnermik misilitsikkusunnerlutik aalajangiinissaminnut neqeroorfigineqassapput.
- Efterskolersimasut efterskolertussanut siunnersuisutut atorneqassapput.
- Danmarkimi kalaallit efterskolertut pillugit nittartakkatigut attaveqatigiiffitsigut qaammarsaasoqassaaq.
- Danmarkimi nunatsinnilu efterskolet akornanni paarlaasseqatigiinnerusoqassaaq.
Aallerfik: Ilinniartitaanermut naalakkersuisoqarfik Danmarkimilu efterskolet kattuffiat
Doris Jakobsen: Efterskolertussanut ajornannginnerulersitsineq
Ilinniartitaanermut naalakkersuisoq, Doris Jakobsen Jensen Danmarkimilu efterskolet kattuffiat tusagassiutinut nalunaaruteqarlutik allapput kalaallit inuusuttorpassuit danskisut pikkorinnerulerusullutik Danmarkimut efterskoleriartartut:
”Ilinniaqqinnissap iluatsinnissaanut danskisut piginnaaneqarluarnissaq pingaaruteqarmat. Taamaammat oqaatsitigut piginnaasakinneq unittarnermut peqqutaaqataasutut oqaatigineqarnera imminut assortuupput”
Atuartumulli efterkolsernissap ajunnginnerulernissaanut suleqatigiinniartut arlalinnik suliniutissaqarput:
Efterskolet ”inuusuttup ilikkagassatigut, inuttut inooqatigiinnikkullu piginnaasaat pillugit paasissutissinneqartarsinnaanerinut ilusiliussassanik periarfissanillu suliaqartoqassaaq, soorlu atuarfinnit oqaaseqaatiginik piniarnikkut soorlu IT-kkut nalunaarsuinerit atorneratigut” tusagassiutinut nalunaarummi allassimavoq.
Danmarkimilu kalaallinut efterskolertussatut piareersartarneq pilersinneqassaaq. Siunnersuut IMAK-ip taperserpaa nangaanngissuteqarfiunngilarli:
- Isumassarsiatsialaat ilagisinnaavaat. IMAK-imilu uagut isumaqarpugut siusinnerungaatsiartukkut iliuuseqartoqartariaqartoq.