Eqqusseriartut amerlanerusut tigusarineqartut: Hashi ajornartorsiutaasoq
Politiit Kangerlussuarmi ulappupput, ikiaroornartorlu hash ajornartorsiutaavoq.
Ikiaroornartumimmi iioraasimasut anngiortumillu nunatsinnut eqqusseriaraluartut arfinillit septembarimi tigusarineqarput. Inuit taamaasillutik 39-t iioraallutik eqqusseriaraluartut ukioq manna paasineqarput. Kalaalllit Nunaanni Politiit taama nalunaaruteqarput.
Nunatsinnut anngiortunik eqqussuisut hashimik eqqussinerusartut, Kalaallit Nunaanni Politiit KNR-imut paasissutissiipput.
- Qularnanngitsumik taanna piumaneqarnerpaavoq, Kalaallit Nunaanni Politiit misissueqqissaarnermut pisortaat, Lars Bjerregaard, oqarpoq.
AAMMA ATUARUK Arsaarinnittoqaqqippoq: Ikiaroornartumik iioraallutik eqqusseriartut arfinillit unitsinneqartut
Anngiortumik eqqusseriaraluartunik tigusarinninnissamut pikkorinnerulersimanertik pissutaalluni amerlanerit tigusarineqartalersut politiit namminneq oqaatigaat.
Inuit amerlanerusut ikiaroornartumik iioraallutik nunatsinnut eqqusseriaraluartut amerlanerulermata imaanngilaq ikiaroornartoq piumanerulerneqarsimasoq
- Politiimmi ilanngaaserisuisa sulilluarnerat pissutaaqataavoq, inuimmi timmisartumik Danmarkimit Kangerlussuarmut tikittut misissornissaannut periarfissagissaarnerulernikuupput. Ikiaroornartumillu iioraasimasut amerlanerit tassani tigusarisarpavut, Lars Bjerregaard, Kalaallit Nunaanni Politiineersoq, oqarpoq.
Annertoqqataanik piumasoqartoq
Ikiaroornartut anngiortumik eqqunneqartarnerisa akiorniarneqarnissaat Kalaallit Nunaanni Politiit piffissami sivitsortumi aallutarisimavaat.
Politiit Kangerlussuarmi takussaanerulersimapput, amerlanerusummi timimut scannerutikkoortinneqartalerput, politiillu aqqusinermi saqqumilaarnerulersimallutik, politiit pakasaallutik misissuinerusalersimallutik.
Lars Bjerregaard hashimi nunatsinni piumaneqarnerulersimava?
- Naagga, taama oqartoqarsinnaanngilaq. Inuit amerlanerusut ikiaroornartumik iioraallutik nunatsinnut eqqusseriaraluartut amerlanerulermata imaanngilaq ikiaroornartoq piumanerulerneqarsimasoq, taanna oqarpoq, nangillunilu:
- Kisianni piumaneqarpoq, tamannalu pissutaalluni inuit anngiortumik eqqusseriaraluartarput, Lars Bjerrregaard oqarpoq.
Ikiaroornartup akiorniarneqarnissaa Kalaallit Nunaanni Politiit siunissami immikkut aamma ukkatariniarpaat.
AAMMA ATUARUK Kalaallit Nunaanni Politiit toqusoqarnerata kingorna: Ikiaroornartunik iioraasarasi!
- Iliuuseqarfigerusoqaarput, inuillu ikiaroornartumik atuiunnaarnissaat kissaatigalutigu, piumaneqarunnaarpammi ikiaroornartumik nunatsinnut anngiortumik eqqussuinissamut tunngavissaqarunnaassaaq. Taamaattumik eqqussuinerup akiorniarneqarnissaa sulissutigiuassavarput, Lars Bjerregaard, Kalaallit Nunaanni Politiineersoq, oqarpoq.