Arsaarinnittoqaqqippoq: Ikiaroornartumik iioraallutik eqqusseriartut arfinillit unitsinneqartut

Ikiaroornartunik iioraasimasut nunatsinnukariartortut arfinillit politiinit septembarimi tigusarineqarput.

Kalaallit Nunaanni Politiit tusagassiuutinut nalunaarummi paasissutissiipput.

Eqqusseriaraluartut arfinillit 33-t allat ukioq manna iliuuserisaatut iliorniaraluarput: Ikiaroornartunik mikisunut poortorsimasunik iioraasimapput. Ukioq manna anngiortumik eqqusseriaraluartut paasineqartut maanna 39-usut, politiit nalunaarutigaat.

Tamanna siorna anngiortumik eqqusseriaraluartunut 14-inut sanilliullugu 179 procentimik amerleriarneruvoq.

Kangerlussuarmi politiinit aamma malugineqarsinnaalluarpoq, tassami anngiortumik eqqusseriartorpassuit sulissutiginissaanut ulapingaatsiartoqarsimasoq, politiit ikiortaat, Pia Falsig oqarpoq:

- Suliassaqangaatsiarpugut. Ikiaroornartunik iioraasimasumik tigusarinnikkaangatta pineqartoq politiinit ingerlanneqarnissami tungaanut isertitsivimmi tigummigallarneqartarpoq. Anngiortumik eqqusseriaraluartoq iiorarsimasaata tamarmik anillannissaanut nammineersinnaajunnaarsinneqartarpoq – tamannalu ullunik arlalinnik sivisussuseqarsinnaavoq.

AAMMA ATUARUK Yderligere fem personer er blevet taget i at smugle narko i maven

Alianarluinnartumillu kinguneqartartoq, politiinspektørip tullersortaa, nunatsinni Politiit misissueqqissaartartuisa pisortarisaat, Lars Bjerregaard oqarpoq.

Taannalu uggorinnillunilu ernumavoq.

- Isumaqarpunga alianarluinnartumik kinguneqartartoq, minnerunngitsumik tamanna atorfeqarnermut periarfissanut inuunermullu aarlerinartorsiortitsisarmat.

- Tamatuma saniatigut inuiaqatigiit ineriartornerlunnerannut sunneeqataasoqarlunilu atornerluisuunermik ajornartorsiuteqarnerup qaangerniarneqarnissaanut qanigisaasut ilaqutaasullu suliarujussuannut ajoqutaasarpoq.

Ilisimaneqanngitsut siornamit ikinnerusinnaasut

Anngiortumik eqqusseriaraluartut 39-t tamarmik assigiissuteqarput, tamarmimmi tigusarineqarput. Ilaalli paasineqanngitsoortoqassaaq.

Taakkuli amerlassusaat siusinnerusumit ikinnerunissaat ilimanartoq, Lars Bjerregaard naliliivoq.

- Ukioq manna paasineqanngitsut amerlassusaat ukiunit siusinnerusunit ikinnerussapput, tamanna amerlanerusunik tigusarinnilluta iluatsitsinitsinnik pissuteqarpoq.

AAMMA ATUARUK Kalaallit Nunaanni Politiit toqusoqarnerata kingorna: Ikiaroornartunik iioraasarasi!

Kangerlussuarmi timimut scannerut inunnik unitsitsisarnermut pissutaaqataavoq.

Politiit anngiortumik eqquteriaraluarneqartut tamarmik arsaarinnissutigisarpaat. Tamatuma saniatigut pasineqartut eqqartuussutigoortumik akiliisitsinikkut imaluunniit pineqaatissinneqarsimasunut inissiisarfimmiittussanngortitsinikkut kinguneqartitsivineqartarlutik, tamatumalu saniatigut eqqartuussivimmi suliaq ingerlaneranut aningaasartuunut akiliisussaapput.

Poortuutip putuneratigut toqusoq

Angut 33-nik ukiulik Københavnimit Kangerlussuarmut juunimi ingerlaartilluni toquvoq.

Taassuma ikiaroornartut iioragai poortorluarneqarsimanngillat taamaammallu ikiaroornartoq angutip timaaniilersimasoq politiit siusinnerusukkut paasissutissiissutigaat.

Toqungasup timaanik misissuinermi angutip aqajaruani ikiaroornartoq annertooq nassaarineqarpoq.

Angut alla aggustip arfineq-aappaani toquvoq – taassuma iioragaata puua aamma putusimavoq. Taanna naaminik anniangaatsiartoq Nuummi Dronning Ingriud Napparsimmavissuanukaanneqapallappoq. Angulli aqqutaani uummamminik unittoorpoq kingusinnerusukkullu toqulluni.

Taassuma toquneranut pissutissaqanngimmat timaa misissorneqarpoq. Nakorsallu angutip aqajaruani inalugaanilu hashimik poortorsimasumik nassaarput.