Ikiaroornartunik iioraallutik eqqusseriartut amerliinnarput
Inuit tallimat ikiaroornartunik iioraallutik nunatsinnut eqqusseriartut paasineqartut, politiit tusagassiuutinut allapput.
Inuit ikiaroornartunik iioraallutik nunatsinnut eqqusseriartut amerleriapiloornerat Kalaallit Nunaanni politiit, peqqinnissaqarfimmi oqartussat ilanngaaserisullu aggustip 18-iani mianersoqqussutigaat.
Aggustip 18-ini KNR-imi allaaseraarput, qaammatip ataatsip ingerlanerinnaani inuit aqqaneq marluk ikiaroornartunik eqquseriarsimasut paasineqartut. Maanna inuit tallimat aamma paasineqaqqipput.
Ikiaroornartunik iioraallutik eqqusseriaraluartuni inuit marluk aasaq manna toqupput, taamaattorli iioraallutik eqqusseriarnerit ikilinngillat.
Inuit ikiaroornartunik iioraallutik nunatsinnut eqqusseriaraluartut ukioq mannaannaq 33-it paasineqarput. Siorna inuit 14-it paasineqartut.
AAMMA ATUARUK Ikiaroornartumik nunatsinnut eqqusseriartut qaammatip ingerlanerinnaani aqqaneq-marluusut
Taamatut ikiaroornartunik eqqusseriartartut sinerissami siammasissumeersuusut, Kalaallit Nunaanni Politiivisa politiinspektøriannut tullersorti, Johan Westen oqarpoq.
- Nunatsinni illoqarfiup pingaarnersaani taamaallaat ajornartorsiutaanngilaq, eqqusseriartartut nuna tamakkerlugu angalasartut takusinnaavagut. Taamaammat ikiaroornartunik eqqussuiniarneq nunamut tamarmut siaruaateqqavoq, Johan Westen oqarpoq.
- Taamaaliorunnaalaaritsi! Peqqissutsit inoqatitillu eqqarsaatigalugit. Ikiaroornartunillu eqqusseriartartut ilanngaaserisunit qimminillu paasineqartarput. Taamaammat tisugaanissat ilimanaateqartorujussuuvoq.
Eqqusseriartuni marluk toqusut
Kangerlussuarmi timimut scannerut inuit unitsinneqartarnerannut aamma sunniuteqaqataavoq. Politiit aamma navianartunik mianersoqqussuteqartartut, Lars Bjerregaard oqarpoq.
- Taamaaliorneq qanoq navianartiginersoq soorlu tusagassiuutitigut oqaluttuarisarparput. Toqqutaasinnaavormi, soorlu inuit marluk piffissap sivisunngitsup ingerlanerinnaani ajoraluartumik toqqutigaat. Ikiaroornartoq peqqutigalugu tigusaaneq nuanninngitsumik kinguneqarsinnaavoq. Soorlu parnaarussaassutaasinnaavoq nunanullu allanut angalasinnaajunnaassutaasinnaalluni. Aamma siunissami suliffissatut pilerigisami suliffittaarsinnaannginnermik kinguneqarsinnaasumik pineqaatissinneqarsimannginnermut uppernarsaateqarunnaassutaasinnaavoq, Kalaallit Nunaanni Politiivisa politiinspektøriannut tullersorti, Lars Bjerregaard oqarpoq.
