Politikki Kulturi

Nunatta Isiginnaartitsiviani aqutsisoq: Eqqumiitsuliorneq eqqugaarujussuarpoq

Nunatta Isiginnaartitsisarfianut aningaasaliissutigineqartartut Naalakkersuisut ikiliniarpaat. Tamannalu Isiginnaartitsisarfimmi aqutsisup pakatsinarnerarpaa.

Allattoq Paninnguaq Steenholdt

aggustip 24-at 2018 09:26

- Eqqumiitsuliortutut suliassarput taamaasilluta suliarisinnaajunnaassavarput. Eqqumiitsuliorneq tassani eqqugaarujussuarpoq, Nunatta Isiginnaartitsiviani aqutsisoq Susanne Andreasen oqarpoq.

Isiginnaartitsivimmut amerlanerusunik aningaasaliisarnissaq ukioq kingulleq Inatsisartunit akuerineqaraluarpoq. Aningaasanulli inatsisissatut siunnersuummi taakkua peeqqinneqartussanngorpasipput.

- Tamanna suliatsinnut isumalerujussuuvoq. Soorlu isiginnaartitsissusiornermut, isiginnaartitsinermut qanorlu angalatigisinnaanitsinnut. Aningaasat taakku aningaasaliissutigineqartarunnaassappata, suliagut naammassiumallugit fondinut qinnuteqarneq kisiat isumalluutaalissaaq.

AAMMA ATUARUK Isiginnaartitsisarfimmi aqutsisoq ilisimatoorlu Kraks Blå Bogimut ilanngunneqartut

Sulisut kisimik eqqugaanngitsut

Aqutsisorlu naapertorlugu isiginnaartitsivimmi sulisut kisimik sipaarniarnermit eqqugaassanngillat.

- Isiginnaartitsisartut suliatik isumaqartittupilussuuaat. Inuunerminni ineriartuutigisaraat takusinnaavarput. Inuusuttut soorlu neriunnermik tunineqartartut, naak ajornartorsiutaat imaannaanngikkaluaqisut. Tamakku tamaasa isiginnaartitsisarnerup nassatarai. Isumaqarpungalu tamanna puigorneqartartoq, Susanne Andreasen oqarpoq.

Assersuutigalugulu allaffissorneq sipaarniarfissaanngitsoq, aqutsisup oqaatigaa:

- Allaffissorneq sipaarfigiuminaappoq, allaffissornerpummi anikitsuaraareerpoq, Susanne Andreasen oqarpoq.

AAMMA ATUARUK Isiginnaartitsissut nuannarineqaqisoq angallakkaat