Eqqumiitsuliorneq danskit kalaallinik isiginnittariaasiannik allannguissaaq
![](/sites/default/files/styles/image_934x467/public/article_images/mf_aaja_chemnitz_larsen_inuit_ataqatigiit.jpg?itok=lU_FoVS4)
Folketingemi ilaasortap Aaja Chemnitz Larsenip, Inuit Ataqatigiinneersup, danskit kulturministeriat Mette Bock sisamanngornermi ataatsimeeqatigaa. Tassani kalaallit eqqumiitsuliaat kulturiallu atorlugit qakllunaat kaalallinik paasinninnerulersinnaanerat ilisimasaqarnerulersinnaanerallu oqallisigineqarpoq, taamatullu pigiliuutiinnakkanik kalaallinut isummertarnerup pinaveersaartinneqarsinnaanera oqaluuserineqarluni.
Aaja Chemnitz Larsen sapaatip akunnerata siuliani kalaallinik eqqumiitsuliortunik qulinik kalaallit eqqumiitsuliaat kulturiallu pillugit oqaloqateqarnerata kingorna Mette Bock ataatsimeeqatigaa.
Kalaallit eqqumiitsuliortuinik oqaloqateqarnermi isumassarsiat eqqarsaatigineqartullu danskit kulturimut ministeriannut ippassaq apuunneqarput.
- Kalaallit eqqumiitsuliaat kulturiallu Danmarkimi, nunani avannarlerni nunarsuarmilu, Kalaallit Nunaata ullumikkut qanoq ittuuneranik ilisimasaqarnerulermik pilersitseqataaffigisarpaa aammalu eqqumiitsuliat atorlugit oqaloqatigiittoqarluni, Aaja Chemnitz Larsen danskit kulturministeriannik ataatsimeeqateqarsimaneq pillugu ilaatigut taama oqarpoq.
Mette Bock Aaja Chemnitz Larsenip suliniutaanut tapersersuivoq.
- Kalaallit eqqumiitsuliaanik kulturiannik Danmarkimi soqutigineqarnerulernissaannut tapersersorneqarnissaannullu Kulturministeri peqataaniarpoq.
- Mette Bock ajungitsumik tapersersuilluni ersersitsinera ingerlariaqqinnissamut aallaviulluassaaq, Aaja Chemitz Larsen iluarisimaarinnilluni taama oqarpoq.
Aaja Chemnitz Larsenip atuartitaanermut ministeri Merete Riisager Andersen ataatsimeeqatigisareerppaa, aamma taassuma kalaallit nunaannik ilisimasaqartut eqqumiitsuliortullu atorlugit danskit atuarfiini atuartitsissutinik suliaqartoqarsinaaneranik tapersersuivoq.