SIUNNERSUUT Lottomut bingomullu akileraarutaarulli
![](/sites/default/files/styles/image_934x467/public/article_images/jens_imanuelsen1_2.jpg?itok=7hNuLYJ6)
Lottomi bingomilu eqqukkat 15 procentii akileraarutinut akilerneqartarput. Tamannalu annertuallaartoq, Jens Immanuelsen isumaqarpoq.
Peqatigiiffinnut eqquiniaatitsillutik aningaasanik katersuiniartunut akileraarutip atorunnaarsinnissaa allannguutissatut siunnersuutigineqarpoq.
- Peqatigiiffinni sulisut atungaat pitsanngorsaaviginiarlugit una akileraartarnermut tunngasoq peqatigiiffiit katersuiniarnerannut eqqukkat akileraarutaannut peerneqarnissaa siunnersuutigivara. Isumaqarama taakkua nukipparujussuit atorlugit pitsaasumik anguniagaqarlutik suliaqarnerat tassuunakkut aamma oqilisaaffigineqarsinnaasoq, allannguutissamik siunnersuuteqartoq, Jens Immanuelsen KNR-imut taama oqarpoq.
Naalakkersuisuniilli taperserneqanngilaq
Eqquiniaasitsinermut akileraarutit annikereerneri Naalakkersuisunit ilaatigut tunngavilersuutigineqarluni.
Akileraarummik appaaneq imaluunniit akileraarutaarutsitsinerup akileraartarnermi malittarisassanik unioqqutitsinissamut pileritatsitseriaannaavoq. Nunattalu karsianut annasaqaataanissaa Naalakkersuisut aamma ernumagigamikku. Tamannami sipaarniartariaqalernermik kinguneqaratarsinnaammat.
Illerfissarsiutileqatigiiffiup Ikioqatigiiffiup Sisimiuniittup akileraarutit atuukkunnaartinneqarnissaat tapersersoraluarpaat.
- Bingortarnermi isertitarisartakkagut annikittuarakasiupput ilaannilu iluanaarutaaneq ajorpoq. Taamaattumik akileraarutit akileraangatsigu taava katersuiniarnerugaluarput isumaaruttarpoq. Tassa akileraarutit akilerutsigu isertitaqanngitsoortarpugut, Peqatigiiffik Ikioqatigiiffimmi aningaaserisoq Johannes Lundblad oqarpoq.