Eqqartuussivik: Arctic Sunrisep ajoqusernerinut Rusland taarsiissuteqassaaq
Greenpeacep umiarsuaata Arctic Sunrisep 2013-imi avatangiisinik illersuiniarluni akerliussutsimik takutitsinermut atatillugu russit oqartussaasuinit unitsinneqarnera, kingornalu Murmanskiliartinneqarnera pillugu suliami Rusland Hollandimut taarsiissuteqartussanngortitaavoq.
Greenpeacep umiarsuaani Arctic Sunrisemiittut - taakkununnga ilaalluni aquttut pingajuat Anne Rie Roer Jensen Danmarkimeersoq - Gazpromip Issittup imartaani uuliasiorluni qillerivianut akerliussutsimik taamani takutitsipput.
AAMMA ATUARUK Avatangiisinik illersuiniaq Danmarkimeersoq imaani piiasutut unnerluutigineqarpoq
AAMMA ATUARUK Greenpeacep umiarsuaa Ruslandimit aallaqqusaalerpoq
Nunat tamalaat akornanni immani pisinnaatitaaffiit pillugit eqqartuussiviup aalajangiinera naapertorlugu, Arctic Sunrisep atortuinik umiarsuullu inuttaanik ajoqusiisoqarsimaneranut Holland taarsiivigineqassaaq taakkulu ernialersugaassallutik, eqqartuussivik ippassaq ataasinngornermi taama ilisimatitsivoq.
Rusland taamaalilluni Anne Mie Roer Jensenimut inuttallu sinnerinut suli annertussusilerneqanngitsumik taasiissuteqartussanngortinneqarpoq.
Aningaasatigulli taarsiissuteqartoqarnissaa Greenpeacemit ilimagineqarpallaanngilaq, Ruslandimi suliap eqqartuussivimmi suliarineqarneranut maannamut peqataaffigiumasimanngilaa.