Eqqartuussisuuneqarfik: Angut mianersuaalliorluni nivattaassuarnik apuilluni toqutsisimasutut eqqartuunneqartoq
Angut 41-nik ukiulik mianersuaalliorluni toqutsisimasutut Nunatta Eqqartuussisuuneqarfianit eqqartuunneqarpoq. Suliaq pineqartoq februaarip qulingani 2023-mi pivoq, angutimmi arnaq 63-inik ukiulik nivattaasuarnik taamani aporpaa.
Angut unnerluussisussaatitaasut inassutaattut pinerluuteqaqqissaguni ulluni 30-ni pinerluuteqarsimasunut inissiisarfimmiittussanngortinneqarpoq, 30.000 koruuninik akiligassinneqarluni biilinillu ukiuni qulini ingerlatsisinnaajunnaarluni.
Angut Eqqartuussisoqarfik Sermersuumi siorna oktobarimi eqqartuunneqarpoq, taassumali eqqartuunneqarnini Nunatta Eqqartuussisuuneqarfianut suliassanngorteqippaa.
- Mianersuaalliorluni toqutsinertut Eqqartuussisoqarfik Sermersuuup eqqartuussinera Nunatta Eqqartuussisuuneqarfiata isumaqatigaa, taamaattumik Eqqartuussisuuneqarfik Sermersuutulli eqqartuussisoqarpoq, unnerluussisussaatitaasoq Anita Larsen oqarpoq.
Pisoq alianarluinnartoq
Angutip arnaq 63-inik ukiulik aqqusinermi qulliit angallannermi najoquutassat nalaanni aporpaa, taamaattumik angut angallannerup isumannaatsuunissaanik malittattarisassanik pingaarutilinnik malinnissimanngitsoq Nunatta Eqqartuussisuuneqarfia isumaqarpoq.
Arnap inuunera annaanneqanngilaq aporneqareernermilu kinguninngua toqusutut nalunaarutigineqarluni.
- Nunatta Eqqartuussisuuneqarfiata eqqartuussinera soorunami naammagisimaarpara, pineqaatissiinissamummi inassutiga assigaa, Anita Larsen oqarpoq nangillunilu:
- Suliarli kikkunnut tamanut alianarluinnartuuvoq. Qanorluunniit inerneqaraluarpat suliani imaattuni ajugaasoqarneq ajorpoq.
Pisut tallimat pineqaatissiissutigineqartut
Angut toqutsisutut pisuutinneqarluni eqqartuunneqarnermi saniatigut eqqunngitsumik unnerluutiginnissimasutut arlaleriarlunilu imigassartorsimatilluni biilinik ingerlatsisimasutut Eqqartuussisoqarfik Sermersuumit ukiarmi eqqartuunneqarpoq. Unnerluussissut naapertorlugu imigassartorsimatilluni biilinik ingerlatsinermut pissutsit marluk ullualuinnarnik nikingassuteqarput.
Taakku eqqartuussutit angutip Nunatta Eqqartuussisuuneqarfianut suliassanngorteqqinngilai, pineqatissiinissamilli ataatsimut nalilersuinermi apeqqutaaqataallutik.
Angut 41-nik ukiulik arnamik 63-inik ukiulimmik apuinermi kingorna imigassartorsimanersoq uuttorneqarpoq. Taanna biilinik ingerlatsinermi nalaani imigassartorsimanngitsoq uuttuinerup takutippaa.
