Eqqartuussissuserisut misissuinerat naammassisoq: Borgmesteri atorfilittallu sammineqartut
Nunatsinni kommunit annersaani borgmesteri, Charlotte Ludvigsen, atorfilittallu pingasut siulliullutik akiuussuserneqanngikkunik, akiuussusersuinermut ikiuunnissartik unitsiinarniarlugu sioorasaaripput. Akiuussusersuinermut ataqatigiissaarisoq KNR-imut juulimi taama paasissutissiivoq.
Oqaluuserisassaq matoqqasoq
Eqqartuussissuserisut arlaannaannulluunniit attuumassuteqanngitsut, Nuna Advokater, Charlotte Ludvigsenip akiuussusertinnera pillugu aggustip aallartilaarnerani misissuipput, tamatumalu inernera Kommuneqarfik Sermersuumi kommunalbestyrelsip unnummut ataatsimiinnerminni matoqqasumik oqaluuserissavaat.
Tamanna Kommuneqarfik Sermersuup attaveqaqatigiinnermut pisortaata KNR-imut paasissutissiissutigaa.
AAMMA ATUARUK Akiuussusersuinermut ataqatigiissaarisoq: Borgmesteri atorfilittallu salliullutik akiuussuserneqarniassagamik sioorasaaripput
Oqaluuserisassat matoqqasut kommunalbestyrelsimut ilaasortaanngitsunit malinnaavigineqarsinnaanngillat.
KNR-ip Charlotte Ludvigsen attavigivaa, taannali ullumikkut apersorneqarnissaminut periarfissaqannginnerarpoq.
Demokraatit sinnerlugit kommunalbestyrelsimut ilaasortaq borgmesterillu tullersortaa siulleq, Justus Hansen aamma attavigaarput, taannali ataatsimeereernermi aatsaat oqaaseqarumavoq.
Siumut sinnerlugu kommunalbestyrelsimut ilaasortaq, Inga Dora G. Markussen aamma attaviginiarsarigaluaratsigu akinngilaq.
AAMMA ATUARUK Kommune: Atorfillit siorasaarinngillat, ikiuinissamulli akiuussuserneqarumapput
Inuit Ataqatigiit tunuliaqutaralugit Kommuneqarfik Sermersuumi borgmesterip Charlotte Ludvigsenip, utaqqisunit allanit siulliulluni akiuussusertissimanera pillugu oqaluttuaq ataasiinaanngilaq.
Namminersorlutik oqartussat akiuussusersuinermut taamani ataqatigiissaarisua Anna Wangenheim pisumi najuuppoq, borgmesterillu atorfilittaatalu akiuussuserneqarnissartik piumasarimmassuk uukapaatinneqartutut misigisimalluni KNR-imut oqarpoq.
Kommunilli Anna Wangenheimip siorasaarineraanera ilisarisinnaanngilaa. Tamanna kommunip suliffeqarfimmi kiffartuussiffiani pisortaagallartup, Gerth Jacobsenip nassuiaatigaa.
Borgmesteri utoqqatsertoq
Charlotte Ludvigsen pisoq pillugu juulip ulluisa 29-anni ajuusaarlunilu utoqqatserpoq.
Borgmesteri atorfilittanilu siuleriiaattunik qaangiiginnarnera pissaanermik atornerluinertut taanneqarsinnaavoq.
Aalborg Universitetimi inatsisilerinermik ilinniarfimmi professori Sten Bønsing Sermitsiaq.ag-mut naliliivoq.
Kommunalbestyrelsi nalunaaqutaq tallimaniit arfineq pingasut tungaanut ataatsimiissaaq.
