Kommune: Atorfillit siorasaarinngillat, ikiuinissamulli akiuussuserneqarumapput
Kommuneqarfik Sermersuup borgmesteriata, Charlotte Ludvigsenip (IA) atorfilittaasalu akiuussuserneqarnissamut sapaatip-akunnerata siuliani siuleriaattut qaangiinnarpaat.
Akiuussusersuinermut ataqatigiissaarisup, Anna Wangenheimip oqarnera naapertorlugu taakku akiuussutissamik kapiteqqaarniassagamik siorasaaripput.
Borgmesterip akiuussutisserneqarneqarnera pillugu suliaq:
- Nuummi innuttaasunut tamanut akiuussusersuinissamut sisamanngornermi juulip ulluisa 22-anni marluniit tallimat tungaanut atuarfimmi USK-imi neqeroortoqarpoq.
- Nalunaaqutarli tallimanngunngitsoq akiuussutissat nungummata utaqqisut akiuussusersuisunit angerlartinneqaannartariaqarput.
- Inuttaasut arlallit akiuussusersortikkusullutik akiuussusersuineq aallartinngitsorli silami utaqqillutik siuleriiaatilereerput.
- Siuleriiaattut ullup ingerlanerani amerliartuinnarput. Siuleriiaaqangaarmallu siuleriiaat Hotel Hans Egedep nalaanut killipput. Akunnerpassuarnillu utaqqereerlutik akiuussuserneqarsinnaanatik paasitinneqarput.
- Borgmesteri, Charlotte Ludvigsen taassumalu atorfilittai pingasut siuleriaattut ullaap tungaani saneqquppaat, taakkulu matukkut allakkut isertinneqarput. Atorfilittat silataani siuleriaattunik nakkutiginninnermi ikiuuttussaapput.
- Akiuussutissalersuinermut ataqatigiissaarisup, Anna Wangenheimip oqarnera naapertorlugu taakku akiuussutisserneqarnissamik piumsaqarput – taamaattoqanngippallu siuleriiaattuni ikiuiniarnatik.
- Kommunip siorasaaruteqartoqarneraanera itigartitsissutigaa – borgmesterillu tamanna ”paatsooqatigiinnerusimassasoq” ilimagalugu.
- Borgmesterip siuleriiaattunik qaangiiginnarluni utaqqisorpassuit allat sioqqullugit akiuussutisserneqarsimanini utoqqatsissutigaa.
- Namminersorlutik oqartussat utoqqatsertoq: “ Kukkusimanerput nassuerutigaarput, sialussuup ataani akunnerpassuarni utaqqisimasut akiuussuserneqaratillu angerlartiinnartariaqarsimagatsigit. Akiuussusersorneqanngitsoornerallu soorunami naammaginanngilluinnarpoq. Akiuussusersuinissamullu aaqqissuussinerlunneq pillugu utoqqatserpugut.
Kommunimi akiuussusersuiffiup silataani siuleriaattunik nakkutiginninnermut ikiuukkusuppoq. Atorfillillu suliaqalinnginnerminni akiuussutissamik kapiteqqaarusupput. Kapiteqqaanngikkunillu suleqatiginnikkunnaarniarlutik.
Anna Wangenheim taama nassuiaavoq. Taanna peqqinnissamut naalakkersuisuunikuuvoq, taannalu sapinngisamik amerlanerpaanik akiuussusersuinissamut atatillugu Namminersorlutik Oqartussanit juulimi atorfinitsinneqarluni.
Kommunilli Anna Wangenheimip siorasaarineraanera ilisarisinnaanngilaa. Tamanna kommunip suliffeqarfimmi kiffartuussiffiani pisortaagallartup, Gerth Jacobsenip nassuiaatigaa.
Tassuma atorfillit pingasut allanit sukkanerungaatsiartumik akiuussuserneqartut akiuussusersuisoqarneranilu siuleriaattunik nakkutiginninnermi ikiusussaasimasut oqaloqatigai.
Atorfillit siuleriiaattorpassuunerat toqqissisimanartikkaat
Atorfillit allanit siulliullutik akiuussuserneqarnissartik apeqqutigisimagaat eqqortuusoq Gerth Jacobsenip oqaatigaa.
Tassanilu akiuussusersuisoqarneranut atatillugu siuleriaattunik nakkutiginninnissaminni tunillatseratarsinnaanerat tunngavilersuutigineqarpoq.
- Ullaap tungaani piareersaajartorlutik kapuiffiup eqqaanukaramik inuppassuit, tassa inuit 100-t sinnerlugit siuleriiaatilereersimasut malugisimavaat. Tassanilu peqqinnissaqarfimmiit ataqatigiissaarisumut saaffiginnissimapput namminneq aappassaanik kapitinnissartik ammannginnerani perusullugu, silataani suliassartik nakkutigisinnaaniarlugu, Gerth Jacobsen oqarpoq.
Akiuussuserneqarnermi ulloq ingerlaannartumik akiuussutissaq iluaqutaanavianngilaq. Sooq taava sulisut pineqartut ulloq taanna akiuussusernissartik perusussimavaat?
- Takusinnaasimagamikku akiuussusersuinermut pilersaarutit aggustip naanerata tungaanut ingerlaavassasut. Taamaammat akiuussutissaq ingerlaannartumik pinissaq pisariaqartillugu naliliipput, taamaalillutik piffissap sinnera aamma peqataaffigisinnaallugu.
AAMMA ATUARUK Charlotte Ludvigsen akiuussuserneqarnissamut qaangeraanini pillugu: Ajuusaarpunga - utoqqatserpunga
Kommuni siuleriaattuni ikiuutissasoq ulloq sioqqullugu isumaqatigiissutaareersimavoq. Taava sooq kapitinnissamik piumasaqariataarpat aamma borgmesteri ilanngullugu?
- Inuit amerlassusaat takoriaramikku inuppassuillu akunnerpaaluit sullittussaallugit, nalunngilarpullu tuniluunneq inuit akornanni pisartoq. Namminneq taava misigisimalerlutik toqqissimannginnermik taamatut sullississagunik.
- Inuit ullaap tungaani siuleriaattorpassuit 100-nit amerlanerusut takoriaramikkit toqqissisimajunnaarput, siuleriaattunimi akunnerpaalunni suliaqartussaapput. Tuniluunnerlu ungasillisimaannginnermi pisarpoq. Taamaammat suliaqaannarniarunik akiuussutissamik kapitikkusussimapput.
- Borgmesterimut tunngatillugu taassumap nammineq nassuiaatereerpaa, Gerth Jacobsen oqarpoq.
Akiuussutissamik noqqaateqarneq naleqquttoq
Taassuma atorfillit pingasut akiuussutissamik kapitinniarsimanerat naleqquttuusoraa.
Akiuussusersuineq aallarteqqaarmat utoqqaat peqqinnissaqarfimmilu sulisut tunillatsinnissamut aarlerinartumiinnerat pissutigalugu siulliullutik kapitipput. Taamaammat akiuussusersuinermi siuleriiaattunik sankkutiginnittussat aamma aarlerinartumiittut, Gerth Jacobsen naliliivoq.
- Taamaammat nammineerlutik suleqataaneq ingerlatissagunikku taava kapitittariaqarlutik naliliisimapput, uanga taanna ajornartussaqanngitsutut isumaqarfigaara.
Kisianni borgmesteri inunnik paarsissusaatitaanngikkaluarluni taava sooq akiuussuserneqarpa?
- Borgmesterip nammineq nassuiaateqareerpoq, tassunga tunngatillugu ilassutissaqanngilanga.
