Eqqartuussissuserisoqarfik: Kielsen nipisattassanut suliamut attuumassuteqarpallaanngilaq
Kim Kielsenip (S) nipisattassanik qaffaaqataanermi saniatigut umiatsiaminik aalisartumut attartortitsinerani attuumassuteqarpallaarnermut malittarisassat unioqqutinneqanngillat.
Danskit eqqartuussissuserisoqarfia, Poul Schmith nipisattassanut atatillugu taama naliliivoq. Naalakkersuisut siulittaasuata nammineerluni eqqartuussissuserisoqarfik suliamik misissuisussanngortitaraa.
- Ataatsimut isigalugu siulittaasup Naalakkersuisup 2020-mi maajip ulluisa aqqaneq-aappaanni aalajangeeqataanerani (Kim Kielsen aaqq.) attuumassuteqarpallaarnermut malittarisassat unioqqutitsinneqanngitsut nalilerpara, eqqartuussissuserisoq eqqartuussissuserisoqarfimmilu, Poul Schmithimi piginneqataasoq, Paw Fruerlund naliliinermi allappoq.
Naalakkersuisut 2019-imi nipisattassarineqarsimasut sinneri 204 tonsit 2020-mut nuutsinniarlugit maajip ulluisa 12-ianni aalajangerpaat.
AAMMA ATUARUK Naleraq Atassullu: Kielsenip nipisattassiissutinut akuunera misissorneqalersoq qujanaq
Kielsenilli nipisattassiissutit qaffannissaannut ataatsimeeqataannginnermini suliamut attuumassuteqarpallaaratarsinnaanini Naalakkersuisunut nalunaarutigisimasariaqaraluaraa, Paw Fruerlund allappoq.
Kukkunersiuisut ataatsimiititaliaata suliaq suli misissuiffigigaa
Suliaq akerleriissutaasoq maajip qaammataata naanerani Kim Kielsenip umiatsiaminik aalisartumut attartortitsisimanera piffissamilu tassani nipisattassanik qaffaaqataanera saqqummiunneqarmat aallartippoq.
Illuatungiliuttut partiiat, Inuit Ataqatigiit Kim Kielsen atuuffimminik atornerluinerarlugu tusagassiuutinut nalunaaruteqarput.
Pasilliutigineqartulli Kim Kielsenip KNR-imi Qanoruumi apersorneqarnermini itigartitsissutigai.
AAMMA ATUARUK Kukkunersiuinermut ataatsimiititaliamit nipisannut suliaq pillugu apeqquteqartut
Immikkut ilisimannittut qassiiusut Kim Kielsen suliamut attuumassuteqarpallaartutut nalilerpaat.
Poul Schmithimit naliliinermi Kielsen aningaasatigut iluanaaruteqarniarsimanngitsoq imaluunniit umiatsiaminik attartortumut ikinngutigiinneq pissutigalugu soqutigisat tungaatigut attuumassuteqarpallaartoqalinngitsoq saqqummerpoq.
Inatsisartut kukkunersiuinermut ataatsimiititaliaat nipisattassanut suliaq Kielsenillu tassani akuunera aamma misissuiffigileruttorpaat. Taakkunanngali inaarutaasumik suli inerniliisoqanngilaq.