Immikkut ilisimasallit naliliipput: Nipisattassat amerlineqarmata Kielsen attuumassuteqarpallaarpoq
Naqqiut: Allaaserisami siusinnerusukkut allassimavoq, Kielsenip ikinngutaa pisassiissutit amerlinnerisigut nipisannik qasseeriarluni tunisisimasoq.
Tamanna uppernarsarsinnaanngilarput, taamaammallu peerparput.
Kim Kielsen nipisattassanut 204 tonsimik amerlileeqataagami attuumassuteqarpallaarpa?
Naalakkersuisut siulittaasuat nipisattassanik 204 tonsimik amerlileeqataagami suliamut attuumassuteqarpallaarnersoq apeqquserneqarluni, imminut iluanaarutissanik iliuusernerarneqarpoq.
Kielsen Qanoruumi pingasunngornermi unnukkut apersorneqarami umiatsiani ikinngutiminut nipisanniarnerup nalaani atukkiukkamiuk 27.000 koruuninik iluanaaruteqarsimanerarpoq.
AAMMA ATUARUK Kim Kielsenip pasilliutigineqartut itigartitsissutigai: Akuliussinnaanngitsuunngilanga
Kim Kielsenilli suliamut attuumassuteqarpallaarsimanerarneqarnini ingerlatsinermullu inatsimmik unioqqutitsinerarneqarnini itigartitsissutigaa. Syddansk Universitetimili pisortat inatsisaannut professori, Bent Ole Mortensen aperigaanni Kim Kielsen pisassiissutinik amerlileeqataasimasariaqanngikkaluarpoq.
Inatsit qanoq oqarpa?
§ 3. Kinaluunniit pisortatigut ingerlatsinermi suliaqartoq suliassami aalajangersimasumi peqataasinnaanngilaq,
1) nammineq imminut eqqarsaatigaluni aningaasalluunniit eqqarsaatigalugit suliap qanoq inerneqarnissaanik soqutiginnilluinnartuuguni imaluunniit siusinnerusukkut suliami tassani kimulluunniit taamatut soqutiginnittumut sinniisuusimaguni,
2) taassuma aapparisaa, eqqarlia imaluunniit aappariinnnikkut siulimigut kinguaamigulluunniit siulimiluunniit qatanngutaasigut imaluunniit allatigut qanitaasigut qanitsigisumik qanigisarinnittuusoq imminut eqqarsaatigaluni aningaasalluunniit eqqarsaatigalugit suliap qanoq inerneqarnissaanik soqutiginnittuuppat imaluunniit kimut taamatut soqutiginnittumut sinniisuuppat,
...
5) pissutissaqarpat kinaassusersiorsinnaanngissusia qularilissallugu..
...
Imm. 3. Suliassami pissuteqartumik peqataasinnaanngitsoq suliassap suliarineqarnerani aalajangiissanngilaq, aalajangiinermi peqataassanngilaq allatulluunnit peqataassaanngilaq.
§ 4. Suliassap suliarinissaani siuliini taaneqartup taassuma taartissaanik pissarsinissaq ajornavissappat imaluunniit ajornartorsiutaasorujussuuppat § 3-mi aalajangersakkat atortuussanngillat.
Imm.2. § 3-mi aalajangersakkat ingerlatsinermut oqartussaaqatigiinnut ilaasortaasunut atortuupput, naak sinniisussaqartitsisoqarsinnaanngikkaluartoq.
Pisortat ingerlatsineranni suliassat suliarineqartarnerat pillugu Inatsisartut inatsisaat nr. 8, 13. juni 1994-imeersoq.
- Suliap inerneranut aningaasatigut iluaqutissarsissagaanni suliamut attuumassuteqarpallaartutut imminut nalunaarutigisoqartussaavoq, matumanilu aningaasanik iluaqutissarsisoqarpoq, Bent Ole Gram Mortensen oqarpoq.
Taanna Danmarkimi ingerlatsinermut inatsimmut ilisimasaqarluartut ilaannit – Sten Bønsingimit taperserneqarpoq, tamannalu soqutigisanik aporaaffiusutut assersuutaasutut taassuma takusinnaavaa.
- Aalajangiifiusumi inuttut aningaasatigut ilunaarutissaqarneq attuumassuteqarpallaarnermut assersuutissaalluarpoq, suliamilu matumani taamaattoqartoq nalilerpara, Aalborg Universitetimi ingerlatsinermut inatsisinut professori, Sten Bønsing oqarpoq.
Suliaq annikitsoq
Kim Kielsenip umiatsiaaqqani ikinngutiminut umiatsiaaqqaminik aserortoorsimasumut atortissimallugu aningaasallu 27.000-it akiliutaasut umiatsiamut aningaasartuutaasunut nalinginnaasunut matussutaaginnartuuunerarlugit Qanoruukkut pingasunngornermi nassuiaatigaa.
Bent Ole Gram Mortensenillu Kielsenip isertitaqarneranik suliaq annikitsuinnaasoq aamma oqaatigaa.
- Annikitsuinnarmik soqutigisaqartoqaraangat imaluunniit suliap inernissaanut sunniuteqarnissamut periarfissaqanngikkaanni attuumassuteqarpallaartoqarneq ajorpoq, professori oqarpoq, nangillunili:
- Suliaq annikitsunnguuvoq, kisianni tunngaviusumik attuumassuteqarpallaarnerarsimasariaqaraluarpoq.
Kim Kielsneip umiatsiani ikinngutiminut apriilip ulluisa 27-annit maajip ulluisa 19-iata tungaanut attartortippaa, nipisattassallu amerliliinissamut maajip ulluisa aqqqaneq aappaanni aalajangiisoqarpoq.
KNR-ip Kim Kielsen oqaaseqartinniaraluarpaa, Kim Kielsenilli immikkut ilisimasallit naliliinerat oqaaseqarfigerusunngilaa.
