Naleraq Atassullu: Kielsenip nipisattassiissutinut akuunera misissorneqalersoq qujanaq

Nipisattassiissutinut suliaq Kukkunersiuinermut ataatsimiititaliamut tamarmiusumut suliakkiissutigineqassasoq aalajangermassuk Atassut Partii Naleqqallu naammagisimaarpaat.

Suliaq Naalakkersuisut siulittaasuannut Kim Kielsenimut tunngavoq. Taanna Nuummi Maniitsumilu nipisattassiissutit 204 tonsinik maaji qiteqquttoq ilaneqarneranni aalajangeeqataavoq.

Kim Kielsenilli angallatini ikinngumminut aalisartumut piffissami tassani attartortippaa, taannalu ilaatigut nipisanniartuulluni.

AAMMA ATUARUK Kukkunersiuinermut ataatsimiititaliamit nipisannut suliaq pillugu apeqquteqartut

Nipisattasiissutillu ilaneqarnialermata taassuma Naalakkersuisuni isumaqatigiinniarnerit qimassimasariaqanngikkaluarnerai apeqquserneqarpoq.

Suliami tassani inatsisit malinneqarsimanersut Kukkunersiuinermut ataatsimiititaliap qulaajarniarlugu Naalakkersuisunut arlalinnik apeqquteqaateqarput. Apeqqutit avammut saqqummiunneqassanngillat akissutilli Inatsisartunut nassiunneqassapput.

Misissuinialerneq pissusissamisoortoq Atassutip siulittaasua Aqqalu Jerimiassen isumaqarpoq.

- Attuumassuteqarneq eqqarsaatigalugu suliamut qanippallaarneq annertuutigut eqqorneqarpoq. Pisusserissaarnerup aqqani ingerlasoqassappat pingaaruteqartuuvoq, aamma ingasammik nunatta siuttuatut inissisimassagaanni, suliaq qanippallaamik attuumassuteqarfigisat aalajangerneqarnerini peqataannginnissaq, Aqqalu Jeremiassen KNR-imut oqarpoq.

Attuumassuteqannginnerartoq

KNR-ip paasisai naapertorlugit Kim Kielsenip ikinngutaa nipisattassiissutit ilaneqareernerini nipisannik tulaassisimavoq.

Kim Kielsen angallatimi ikinngumminut aalisartumut attartortinneranit 27.000-it koruunit missaanni Qanoruumi sapaatit akunnerata siuliani apersorneqarnermini isertitsisimanerarpoq.

Aningaasat angallammut aningaasartuutinut aalajangersimasunut atorneqarsimasut Naalakkersuisut siulittaasuat oqarpoq.

Kim Kielsen aalisagartassiissutit ilaneqarnerini aalajangeeqataanerminut attuumassuteqarpallaannginnersoq aperineqarami nammineq taamaannginneraavoq.

AAMMA ATUARUK Immikkut ilisimasallit naliliipput: Nipisattassat amerlineqarmata Kielsen attuumassuteqarpallaarpoq

Partii Naleqqamili illuatungerluinnaannik isumaqarput.

- Kammalaatiminut uani ikiuisimaneq minnerpaannguamilluunniit uparuartorneqarluni pineqanngilaq, kisianni suliap suliarineqarnera ilungersunartumut killinnera qulaajaaffissatut inissiffigisussaavoq, Jens Napaattooq KNR-imut oqarpoq.

Suliaq Kukkunersiuinermi ataatsimiititaliamit misissorneqartariaqartoq taanna isumaqarpoq.

Ingerlatsinermut inatsimmik pisortallu ingerlatsinerannut inatsisaannik ilisimasalinnut KNR-imit paasiniaagatta Kim Kielsen, nipisattassiissutit amerlinerat iluanaaruteqarfigisinnaallugu ilisimammagu, suliamut attuumassuteqarpallaartutut imminut nalunaarutigisimasussaagaluartoq taakku naliliipput.

Kim Kielsenilli angallatimi attartortinneranit isertitai amerlanngimmata suliaq ilungersunarpallaanngitsoq taakkua naliliipput.

- Suliaq qanoq iluseqarnersoq, ajortumik ajunngitsumilluunniit kinguneqassappat, apeqqutaanngilaq. Taamaallaat inatsit malillugit suliarineqassasoq pingaaruteqarnerpaavoq, Aqqalu Jerimiassen oqarpoq.

Kim Kielsen KNR-imit apersorumallugu attaveqarfigigaluarparput, taannali apersorneqarusunngilaq.