Kukkunersiuinermut ataatsimiititaliamit nipisannut suliaq pillugu apeqquteqartut
Kukkunersiuinermut ataatsimiititaliaq isumaqatigiittoq nipisattassiissutinut suliaq pillugu apeqquteqarnissamik aalajangerpoq. Naalakkersuisut siulittaasuat, Kim Kielsen, Nuummi Maniitsumilu nipisattassiissutit 204 tonsinik qaffaanissamut aalajangeeqataagami pissaanermik atornerluisimaneragaavoq.
Kim Kielsen naapertorlugu, umiatsiani ikinngumminut aalisartumut atukkiukkamiuk, ikinngutaatalu aalisartup nipisannik tunisineratigut, 27.000 koruunit missaannik iluanaaruteqarpoq.
AAMMA ATUARUK Kim Kielsenip pasilliutigineqartut itigartitsissutigai: Akuliussinnaanngitsuunngilanga
Taamaammat kukkunersiuinermut ataatsimiititaliap inatsisit malinneqarsimanersut paasiniarpaa.
- Nipisattassiissutit qaffanneqarnerannik suliaq pillugu isummernissamut tunngavissiissummik suliaqarneq pillugu tusagassiorfinni piffissami kingullermi allaaserinninneq tunngavigalugu, Naalakkersuisunut apeqqutinik arlalinnik nassiussinissaq Kukkunersiuinermut Ataatsimiititaliamit isumaqatigiittumit aalajangiunneqarpoq, ataatsimiititaliaq tusagassiuutinut nalunaarummi allappoq.
Akissutit Inatsisartunut tunniunneqassasut
Ataatsimiititalialli apeqqutai tamanut oqaatigineqaqqusaanngitsut, kukkunersiuinermut ataatsimiititaliap siulittaasua, Erik Jensen, oqarpoq. Akissutilli Inatsisartunut tunniunneqarumaarput.
- Taakkualu qanoq inerneqarumaarnissaat qanorlu iliuuseqarfigineqarnissaat Inatsisartut aalajangiiffigiumaarpaat. Inernera takkuppat taanna eqqartorneqartussaassaaq, Erik Jensen oqarpoq.
Taassuma aamma erseqqissaatigaa, ataatsimiititaliap sulinera politikkimut tunngassuteqanngitsoq, taavalu inuttut politikkikkullu atassuteqarnermit sunnerneqassanngitsoq.
AAMMA ATUARUK Immikkut ilisimasallit naliliipput: Nipisattassat amerlineqarmata Kielsen attuumassuteqarpallaarpoq
Kukkunersiuinermut ataatsimiititaliap Naalakkersuisut inatsisinik malinninnersut misissussallugu ilaatigut suliassaraa.
Soorlu inatsisit malinneqarnersut pillugu Inatsisartut kukkunersiuisutut toqqagaannut Deloittemut misissuinissamik suliakkiisinnaavoq.
Naalakkersuisunut ilaasortaq inatsisinik malinnissimanersoq paasiniarlugu misissuinissamik suliakkiisoqarsinnaavoq.
Ataatsimiititalialli sulinera tamanut saqqummiunneqaqqusaanngimmat, misissuinissamik maanna suliakkiisoqarsimanersoq kukkunersiuinermut ataatsimiititaliap oqaaseqarfigisinnaanngilaa.
Attuumassuteqarpallaartoq?
KNR pisortat inatsisaannik ingerlatsinermillu inatsisinut ilisimasalinnik oqaloqateqareerpoq. Kim Kielsen nipisattassiissutit qaffanneqarpata aningaasatigut iluaqutissarsissagami qaffaanermut aalajangernermi attuumassuteqarpallaartutut imminut nalunaarutigisimassagaluartoq taakku naliliipput.
Assersuutigalugu ingerlatsinermut inatsimmut ilisimasaqartup Sten Bønsingip suliaq attuumassuteqarpallaarnermut assersuutissaalluartutut taavaa.
Kim Kielsen attuumassuseqarpallaartutut imminut nalunaarutigisariaqarsimanani Qanoruumit pingasunngormat apersorneqarnermini oqarpoq. Umiatsiani ikinngumminut aalisartumut atukkiukkamiuk ikinngutaata nipisanniarnersoq allanilluunniit aalisarniarnersoq nalullugu Qanoruumut nassuiaatigaa.
