Eqqagalersaarummik filmiliortut
Naalakkersuisup Anthon Frederiksenip Europamiullu Avatangiisinut Allaffiata pisortaata Jacqueline McGlade-p filmi tassanilu eqqartorneqartut pingaarnerit ullumi saqqummiuppaat.
Filmimi angerlarsimaffinniit eqqagassat eqqagassallu ulorianartut sammineqarput. Avatangiisinik illersuiniarnermi eqqagassalerinermiluunniit inuiaqatigiit annikikkaluamik iliuuserisinnaasaasa annertuumik sunniuteqarsinnaanerat takutissallugu filmimi siunertaavoq. Filmi inuusunnerusunut tulluarsagaavoq, nunatsinnilu ilinniarfiit tamarmik filmi pissagaat oqaatigineqarluni. Filmi kalaallisut qallunaatut tuluttullu oqaasertaqarpoq.
Filmip saqqummiunneqarnerata saniatigut ukiup ingerlanerani atuartitsinermi atortussanik nunatsinni eqqagassalerinermut tunngasunik saqqummersitsisoqassaaq. Atuartitsinermi atortussiat Europamiut Avatangiisinut Allaffiata saqqummiussimasaanit isumassarsivigineqartut, Nunamut Namminermut, Pinngortitamut Avatangiisinullu Naalakkersuisoqarfiup Inerisaavik suleqatigalugu atortussiat nunatsinnut tulluarsarpaat.