Eqiterineq siunnerfigilerpaat
Tamatuma kingunerissavaa, Imarsiornermik Ilinniarfiup Paamiuniittup aamma Piniarnermik Aalisarnermillu Ilinniarfiup Uummannamiittup ataatsimut kattunneqarnerat.
Ilinniarfiit taakkua Nuummut Sisimiunulluunniit nuunneqassapput, taaguuteqalerlunilu Imarsiornermik ilinniarfik.
Naalakkersuisut ilinniartitsinermut Periusissat pillugit nassuaataanni tamanna atuarneqarsinnaavoq, nassuiaat ilinniartitaanermut ilisimatusarnermullu Naalakkersuisup Palle Christiansenip inatsisartunut ualeru saqqummiutissavaa.
Imarsiornermik ilinniarfik Nuummut Sisimiunulluuniit nuunneqassaguni, aappaagu kingusinnerpaamik aggustip aallaaqaataani atulissaaq.
Naalakkersuisut naatsorsuutigaat ilinniakkat imminut assingusut imminnullu attuumassuteqartut pilersinneqarpata, ilinniakkaminnik taamatitsisartut ikilissasut amerlanerillu ilinniakkaminnik naammassisaqartalissasut.
Saviminilerinermik ilinniarfimmi Nuummiittumi ilinniakkat amerlanersaat Sisiminut nuuneqarnissaat Naalakersuisut misissorniarpaat, Nuummi Saviminilerinermik Ilinnniarfimmi inuussutissarsiutinik tunngaviusumik ilinniarnerit ukiumik ataatsimik sivisussuseqartut aallartinneqarnissaat aamma missisorneqassalluni.
Ilinniarfiit eqiterneqarnissaannut Palle Christiansenip pilersaarutai, Inatsisartuni Siumup ilaasortaatitaanit marlunnit isumaqatigineqanngillat.
Imarsiornermut Ilinniarfiup Paamiuniittup matuneqarnissaanik pilersaaruteqarneq Ruth Heilmann-ip tupigusuutigaa.
- Neriuutigaara tamanna ilumoortuunngitsoq aammalu Naalakkersuisunit sinnatuaqinerusoq, Ruth Heilmann paragraf 37 naapertorlugu Naalakkersuisunut apeqquteqarluni taamatut oqarpoq.
- Paamiut illoqarfittut ineriartortitassatut isigalugu mittarfimmik aamma pilersitsisoqarnikuuvoq. Aammalu Paamiormiut nammineerlutik ukiuni arlaqartuni suliniutigaat "Paamiut Asasara" naatsorsuutigigamikku taamatut suliniuteqarnerminni Paamiut illoqarfitsialanngussasoq najoruminartoq, Ruth Heilmann paragraf 37 naapertorlugu Naalakkersuisunut apeqquteqarluni allappoq, Naalakkersuisullu taamatut siunnersuuteqarnerat naapertuutinngitsutut isumaqarfigalugu.
Piniarnermut Aalisarnermullu Ilinniarfiup Uummannamiittup matuneqarnissaanik pilersaaruteqarneq Kristian Jeremiassenip qisuariarfigaa, minnerunngitsumik Qaasuitsup kommunea-ni kommunalbestyrelse-mi Siumut sinnerlugu ilaasortaanini pillugu.
- Eqqarsaatigilluagaanngilaq, Kristian Jeremiassen oqarpoq.
Piniarnermik Aalisarnermillu Ilinniarfiup Uummannamiiginnarnissaata ilinniartunut iluaqutissartai taavai, tassalu Uummannap sulluani aasakkut ukiukkullu aalisartoqarsinnnaanera piniartoqarsinnaaneralu pillugit.
- Piniarnermik Aalisarnermillu Ilinniarfik Uummannamiit nuunneqarpat, Qaasuitsup kommunia suliffinnik annaasaqassaaq akileraarutitigullu isertitassanik annaasaqarluni, Kristian Jeremiassen naggasiiivoq.
