Olsvig: Enoksenip tamanut siulittaasuunissani eqqaamassavaa
Hans Enoksenip Inatsisartuni siulittaasuuffittaamini ingerlatsinera Inuit Ataqatigiit siulittaasuata, Sara Olsvigip sakkortuumik isornartorsiorpaa.
- Kalaallit Nunaata, nunatta, nukiit tamaasa atorfissaqartippaa. Oqaatsit tunngavigalugit inuiaat avissaartuutsinneqarnerat unittariaqarpoq. Tamannarpiarlu Inatsisartut Siulittaasuata, nunatsinni qaffasinnerpaamik qinikkatut inissisimasup, siuttuuffigisariaqarpaa, Sara Olsvig oqarpoq.
AAMMA ATUARUK Enoksenip Inatsisartuni qallunaatut allanneq pisariaqarsorinngikkaa
Partiip siulittaasuata Inatsisartuni atortut tamarmik danskisut kalaallisullu tunniunneqartariaqartarnerat unammillernarsinnaasartoq ilanngullugu nassuerutigaa.
Tamatumanilu aaqqiissummik ajornaatsumik nassaartoqarsinnaasoraa. Sara Olsvig isumaqarpoq, partiit allakkaminnik siusinnerusumisut Inatsisartut siulittaasoqarfiannut nassiuttassagaat, tassanilu nutserneqartassasut.
AAMMA ATUARUK Hans Enoksen Inatsisartunut siulittaasunngussaaq
Olsvigillu tamanna toqqaraanni partiit tapisiaminnit ilaangaatsittalissasut erseqqissaatigaa, partiinummi tapit ilaat nutserititsinissamut atorneqartussiaammata.
Naggasiutigalugulu Hans Enoksenimut Inatsisartuni siulittaasunngoqqammersumut sukannerusumik oqariartuuteqarpoq:
- Siulittaasutut suliassat pingaarnersaat tassaavoq nunatta tamat oqartussaaqataanermi oqalliffianni pingaarnerpaami kikkut tamarmik peqataasinnaanissaannut qulakkeerinninnissaq, oqaatsit apeqqutaatinnagit. Inatsisartut Siulittaasuata nalornisitsiunnaarluni oqaatigisimasani piaarnerpaamik erseqqissassagaa naatsorsuutigaarput, Inatsisartullu tamanik inissaqartitsisuussammata erseqqissarlugu, Inuit Ataqatigiit siulittaasuat, Sara Olsvig allappoq.