Enoksen: Nutaamik isumaqatigiissusiornissaq periarfissaanavianngilaq

Namminersorneq pillugu novembarip ulluisa 25-ianni taasinermi naaggaartoqassappat, Danmarkimi oqartussat nutaamik isumaqatigiissusiorusunnissaat periarfissaanavianngitsoq Naalakkersuisut siulittaasuat Hans Enoksen isumaqarpoq:

- Naaggaartoqassagaluarpat nutaamik isumaqatigiissusiornissaq takujuminaatsippara, tassami una periarfissaq ima kusanartigisoq qallunaat peqataaffigisaat akuerinngeriarlugu taama isumaqatigiinniaqqissagaluarutta qularinngilara danskit oqassasut "Piffissaajaatigissanngilassi, periarfissamik taama pitsaatigisumik isaassiffigigaluarlusi akuerinngilarsi", taava suna isumaqatigiinniutigissagatsigu, Hans Enoksen aperivoq.

Taamaammat Namminersorneq pillugu innuttaasunik taasisitsinermi angerneq Namminersornerulluni Oqartussaanerup ingerlariaqqiffissatuaatut nalilerpaa.

- Nammineernissarput, minnerunngitsumillu inuiattut akuerineqarnissarput ukiorparujussuarni eqqartornikuuarput, aammattaaq kalaallit oqaasiisa pisortatigoortumik oqaasiulernissaat kiisalu nunap pisuussutaanik piginnittuulernissarput kissaatigineqarpoq. Naaggaarneqassappata uanga paasisinnaanngilluinnaqqissaassavara.

Nunarsuup sinnerani inuiaassuseq, kinaassuseq nunamillu piginnittussaaneq pillugu pisinnaatitaaffiit naqissuserniarlugit sorsuttoqarnerarpaa, taamaammallu kalaallit taakkorpianut tunngatillugu naaggaassappata paasiuminaatsissallugu.

- Kalaallinit itigartinneqassappat tupinnartorujussuussaaq. Kisianni tamanna naatsorsuutiginngilluinnaqqissaarpara, ukiuni 300-ni nunasiaareerluta aamma ukiut 300-t ingerlaqqissinnaanngilagut, Hans Enoksen taama oqarpoq.