Nunaqarfik aamma alla eqqaavilluttoq
Aappilattumi eqqakkanik ikuallaavik ikuallareerluni atorunnaarmat sivitsorpoq. Eqqakkat ikuallaavikup silataani immap killinganut eqqarneqartalerput, ammasumilu ikuallaasalerput.
Aamma atuaruk Utaqqiinnarsinnaajunnaartut: Eqqagassat piiarneqarlik
Aamma atuaruk Nunaqarfinni arlalinni ikuallaaveqanngilaq
- Eqqaavipput ukiut arfineq-marlunngorput ikuallammalli. Nunaqarfiup eqqaavia kallerup inneqanngilaq qulleqarnanilu. Taamaammat pisariaqartipparput nutaamik eqqaavissuartaarnissarput piviusunngortinneqassasoq. Nunaqarfinni aqutsisuni siulittaasoq Karl Petersen taama oqarpoq.
Upernaviup nunaqarfiini tassani qaleralinnik aalisarfiusumi eqqaaviup avatangiisinut mingutsitsisinnaanera pinngortitaq pillugu suliniaqatigiiffiup WWF-ip qularutiginngilaa.
- Ikuallaavik immamut taamak qanitsigisillugu akuutsissanik ulorianartunik immamut seerisoqassaaq, taamaasillunilu avatangiiseq mingutsinneqarluni, bioloogi WWF-imeersorlu Kaare Winther Hansen oqarpoq.
Eqqakkalli avatangiisinut mingutsitsinerat kisimi ajornartorsiutaanngilaq. Nunaqarfimmi eqqaavilerisoq sulinermini innaallagiatortumik qaammaqqutissaqanngilaq, kaperlanneranilu ajunaarsinnaammat nunaqarfimmiut ernummapput.
Aamma atuaruk Kangaamiuni ikuallaavik nutarterneqarani aserfallappoq
Aamma atuaruk Nanunimmat kommuni eqqakkanut aaqqiissuteqarnialerpoq
- Imaassinnaavoq immamut nakkarsimasoq. Pissutsillu taama ittut akuersaarsinnaannginnatsigit piaartumik atorunnaarsinnissaa piumasaraarput, Karl Petersen oqarpoq.
Qaasuitsup Kommuniani sanaartornermut avatangiisinullu ataatsimiititaliap siulittaasua Aappilattumi ajornartorsiutit pillugit oqaaseqarumanngilaq, ataatsimiinnissamulli qaqinneqassasoq oqaatigalugu.
Kommunimi atorfilittanik oqaaseqartitsinissaq suli iluatsinngilarput.