Qinersisartunik ataatsimiititsineq Politikerit pissaanermik atornerluineq oqallisigissagaat
Qanoq ilillutit aalisagartassat agguaaneqarneranni paasinarsaasinnaavit ilinnullu attuumavallaarpat akuleruffiginagu suliarineqarnera qulakkeersinnaaviuk? Apeqqutit taama ittut politikerinut apeqqutigineqarsinnaapput sapaatiuppat naapitinneqarpata qulequtaralugu: Siunissaq ileqqorlunnertaqanngitsoq.
- Ileqqorlunneq tassaavoq pissaanermik atornerluilluni imminut iluaqutissinneq, Transparency International Greenlandimi, TIG-imi siulittaasoq Anita Hoffer oqarpoq.
TIG 2016-imi Nunatsinni ileqqorlunneq pillugu innuttaasut paasinnittaasiat pillugu paasiniaavoq. Misissuineq taanna ateqarpoq Global Corruption Barometer. Tassani ilaatigut atuarneqarsinnaavoq aperineqartut sisamaangaangasa pingasut isumaqartartut inuit pigissaartut pissaanertik atornerlullugu
nammineq soqutigisaminnik Naalakkersuisuini iluaqutissarsisartut.
- Assersuutigineqarsinnaapput politikerit atorfitik tatiginninnerlu atornerlullugit pisortat aningaasaataannik imminnut atuisimasut.
AAMMA ATUARUK Transparencyp inatsisissatut siunnersuut isornartorsioraa
Hoffer neriuppoq sapaatiuppat qineqqusaartut ileqqorluttuliornermut siunissamullu isumaat sammineqarumaartut.
- Eqqarsaataat paaserusukkaluarpagut, kingornalu pisussat malinnaaffigalugit, qineqqusaarnermilu oqaatsitik eqquutsinneraat uterfiginissaannut qunuginagit.
Nunat tamalaat akornanni Global Corruption qiviaraanni, inuit naliginnaat ileqqorlunneq pillugu akiuniaqataarusunnerat eqqarsaatigigaanni Kalaallit Nunaanni innuttaasut ajunngitsumik inissisimapput. TIG-illu isumaa naapertorlugu qinersisartutut ataatsimeeqataanissaq peqqutissaqarluarpoq.
- Imaappoq: inuit marluungaangasa aappaa isumaqarpoq ileqqorlunneq atorneqaleraluttuinnartoq.
Ilanngutassiap suliarinerani Partiit Siumut, Inuit Ataqatigiit, Suleqatigiissitsisullu Partiiat qinersisartunik ataatsimiititsinissamut peqataaniarlutik nalunaarsimapput, partiit sinneri suli akinngitsut.
Illillu naalaartoq politikerinut apeqqutissaqaruit Transparency Greenlandip facebookimi quppernerani taamaaliorsinnaavutit, imaluunniit Nuummiikkuit Katuamut sapaatiuppat nalunaaqutaq marlunut ataatsimiigiarsinnaavutit.
AAMMA ATUARUK Transparencyp nunatsinni pissaaneqarfiusuni atorfillit allattorneqartariaqarsorigai
