Transparencyp inatsisissatut siunnersuut isornartorsioraa

Inuit Pisinnaatitaaffiinut Kalaallit Nunaata Siunnersuisoqatigiivini kikkut ilaasortaassanersut naalakkersuisunit oqaasissaqarfigineqarnerujumanerat Transparency Greenlandip pingaartumik apeqquserpaa. Transparency Greenlandip siulittaasua Anita Hoffer ernumavoq:

- Kina siunnersuisoqatigiinni siulittaasuussanersoq naalakkersuisut toqqarniarmassuk ajuusaarutigaarput. Siunnersuisoqatigiinnimi ilaasortat siulittaasussamik, siulittaasullu tullianik namminneq toqqarsinnaasariaqarput. Namminneq maannamut toqqaasinnaasarsimanerat nukittoqqutaagaluarpoq, Anita Hoffer oqarpoq, nangillunilu:

- Apeqqusiissagutta naalakkersuisut siunnersuisoqatigiinni siulittaasussamik namminneq toqqaaniarnerat apeqquserusupparput, siunnersuisoqatigiinnimi ilaasortat namminneq toqqaasinnaannginnissaannut siunnersuut siunnersuisoqatigiinni ilaasortanut tatiginninnginnertut nalilersinnaavarput, Anita Hoffer oqarpoq.

AAMMA ATUARUK Siunnersuisoqatigiit katitigaanerat Naalakkersuisut allanngortikkusukkaat

Inuit Pisinnaatitaaffiinut Kalaallit Nunaata Siunnersuisoqatigiivini ilaasortat maanna 15-iusut aqqaniliinnanngortinneqarnissaat siunniunneqarpoq. Suliniaqatigiiffiit assigiinngitsut taamaalillutik siunnersuisoqatigiinni inissat taamaallaat marluk "pilernguttalissavaat":

- Taamaalisoqassappat suliniaqatigiiffiit ilaat ilaasortaatitaqanngitsoorsinnaassapput, sunniuteqaqataasinnaajunnaassallutik, Transparency Greenlandip siulittaasua Anita Hoffer oqarpoq.

Siunnersuisoqatigiinni ilaasortat ikilisarniarneqarnerat immini ajornartorsiutaanngilaq. Siunnersuisoqatigiimmi naliliinerminni tamanna namminneq innersuussutigivaat, ilaasortalli assigiinngisitaartunik sapinngisamik tunuliaqutaqarnissaat pingaaruteqarmat, ilaasortat ikilineqarniarnerat Transparency Greenlandip apeqquserpaa:

- Siunnersuisoqatigiinni ilaasortat ikilinissaat tapersersorparput, tunuliaqutaasulli amerlanerusinnaanerat aamma orniginartinneruarput, Anita Hoffer oqarpoq.