Emmanuel Macron 'tapersersuilluni ikinngutiginnillunilu' tikittoq

Naalakkersuisut siulittaasuat aamma danskit ministeriunerat franskit præsidentiannut tikilluaqqusinissamut Nuup Mittarfiani piareersimapput, tikeraarneralu pingaaruteqartoq, Jens Frederik Nielsenip aamma Mette Frederiksenip erseqqissaatigaat.

- Taassuma (Emmanuel Macronip aaqq.) qaaqqusissuterput akuerimmagu tikeraarmatigullu nuannaarutigaara. Nunatta tiguneqarnissaanik oqalunneq akuerinngilaa aamma nunap pingaaruteqassusaa inatsisillu tamanik ataqqineqartussat erseqqissaatigai.

Uagutsinnut taama annertutigisumik tapersersuinera nuannaarutigissavarput, Jens-Frederik Nielsen oqarpoq.

Nuinamik sunik tamanik nammineq isumaginnissinnaasoqanngilaq

Tikeraarnerata Mette Frederiksenip aamma nuannaarutigigaa malugineqarsinnaavoq.

- Franskit præsidentiata maanngarluni Europami ataqatigiinnermik erseqqissaaqataanera nuannaarutigingaatsiarpara.

- Nunarsuarmi nunamik ataasinnguamilluunniit sunik tamanik nammineq isumaginnissinnaasoqanngilaq, USA-miillu akuersaarneqarsimanngitsumik tatineqaqqanitsinni kunngeqarfittut allanik nukittuunik iligisaqarnissarput pingaartilluinnarparput, danskit ministeriunerat præsidenti minngitsiartoq oqarpoq.

Præsidentilu timmisartumik niugami siullertut ima oqaaseqartoq Ritzau allappoq:

- Ersoqatigiinnermik, tapersersuinermik, ikinngutigiinnermillu oqariartuuteqarlunga Kalaallit Nunaannukarpunga.