Ellemannip politikkimit tunuarnera pissutaalluni ministerit allanngortut
![](/sites/default/files/styles/image_934x467/public/2023-11/20231123-112711-L-1920x1280we.jpg?h=6ac80f4f&itok=EckICQ_m)
Danmarkimi ministerit nutaat maannamullu ministeriusimasut dronning Margrethemik Danmarkimi ullumi ullaap tungaanut nalunaaqutaq aqqanermut, tassa nunatta kitaani nalunaaqutaq arfineq-pingasunut oqaloqatiginnitsikkiartorneqassapput ilisaritinneqassallutillu.
Danmarkimi naalakkersuisut akornanni ministerit paarlaanneranni taama pisoqassaaq.
Jakob Ellemann-Jensenip politikkikkut suliunnaarnera, Troels Lund Poulsenillu ministereqarfinnik marlunnik akisussaaffeqalernera pissutaalluni taama pisoqarpoq. Lund Poulsen illersornissamut ministeritut ingerlaannassaaq, Stephanie Loselu Venstre sinnerlugu nutaatut aningaasarsiornermut ministerinngussalluni.
Eqqartuussissuserisoq, suliffeqarfinnillu aallarnisaasoq Mia Wagner, uissuummissutigineqartumik maanna ministerinngussaaq, digitalimik sullissinemut naligiissitaanermullu ministerinngussalluni. Taanna Folketingimut ilaasortaanngilaq, DR-illi aallarnisaasut pillugit aallakaatittagaani "Løvens Hule"-mi peqataasartutut ilisimaneqarluni.
Aallarnisaasut aningaasaliisussanik ujartuinerminni aallakaatitassiami tassani peqataasarput, Mia Wagnerilu aningaasaleeqataassanerluni tassani aalajangiisarpoq.
Taassuma Marie Bjerre, Danmarkimi naalakkersuisunit maanna tunuartussaq kingoraassavaa.
Morten Dahlin, illoqarfiit nunallu immikkoortui pillugit, ilageeqarnermut, nunanillu avannarlernik suleqateqarnermut Louise Schack Elholm kingoraarlugu ministerinngussaaq, Louise Schack Elholm naalakkersuisunit aamma tunuassaaq.