Elite Sport Greenland Team Danmarkilu suleqatigiinniarput
Nuummi Sisorarfimmi aningaasaliisut, Elite Sport Greenlandimilu timersortartunut aningaasaliiffigineqartunut aaqqissuussisoqarluni, soorlu aamma Team Danmarkimit Danmarks Idrætsforbundimit tikeraaroqartoq.
Timersoqatigiit Nunatsinneersut Danmarkimeersullu suleqatigiilersinnaanerat paasiniarneqarnissaat siunertaasimavoq, piukkunnaatillillu timersortartullu pikkorissut pingaartumik ukiuunerani timersuutini siunissami qanoq tapersersorneqarsinnaanersut paasiniarneqarluni.
Oqaloqatigiinnerit inernerisa takutippaat suleqatigiikkusussusermik takutitsisoqartoq, timersornermillu ataatsimut isigalugu siuarsaasoqarusuttoqartoq:
- Isumaqatigiippugut sakkussatsinnik aalajangersimasunik avitseqatigiissalluta, aamma Team Danmarkip pissusissamik misissueqqissaarnera sukumiinerusumik takorusupparput. Suleqatigiinnissamut sammisat allat itisilernerussavagut siulersuisullu iluminni misissussavaat suna uagutsinnut pitsaanerunersoq. Elite Sport Greenland pitsaasorpassuarnik paasisaqarput siunissami sulinitsinni atorluarsinnaasatsinnik aamma nunanit allanit isumassarsiortarpugut, Elite Sport Greenlandip siulittaasua Malik Hegelund Olsen oqarpoq.
Peqataasut tamarmik ataatsimiinneq siulleq suleqatigiinnissamut qanillisaataasutut isigaat, Elite Sport Greenland oqarpoq, soorlu aamma isumaqatigiittoqartoq piffissap ingerlanerani oqaloqatigiittarnerit pisassasut, tassanilu siunnersoqatigiittarnissamut misilittakkanillu avitseqatigiinnissamut periarfissaqartoq.