Ingerlatsivik Elevhjemmimi pitsanngorsaavugut

Kommunimi Ingerlatsivik tusagassiuutinut nalunaaruteqarluni taama allappoq, kommunip elevhjemmiani pisortap KNR-imi apersorneqarnera aallaavigalugu.

- Pitsanngoriaateqarnissaq soqutigisaraarput, Nanortalimmilu elevhjemmimi pissutsit pitsanngoriaatissaannik arlaqartunik suliaqareerpugut, Kommune Kujallermi Meeqqanut Kulturimillu ingerlatsivimmi pisortaq Jens Korneliussen KNR-imut taama oqarpoq.

AAMMA ATUARUK Atuartut angerlarsimaffiat ikioqquvoq

Elevhjemmimi pisortap Oline Augustinussenip KNR-imit apersorneqarluni ujartorpai, elevhjemmimi sulisut amerlanerusut atuartut pisariaqartitaat naammassineqarsinnaaniassammata.

Atuartut 24-t elevhjemmimi najugaqarput, taakkua ilaat imaannaanngitsunik atugaqarput. Tamannalu pillugu Jens Korneliussen ima allappoq.

- Isumaginnittoqarfik suleqatigalugu atuartut imaannaanngitsumik nammatallit pisariaqartitsinerat aallaavigalugu piffissami qanoq ilisukkulluunniit inunnik isumaginnittoqarfimmit oqaloqatiginnittarnissaminnut periarfissaqarput.

AAMMA ATUARUK Atuartut angerlarsimaffiat nukittorsartariaqarpoq

Periarfissarlu taanna atorluarneqarpoq, Jens Korneliussen oqarpoq.

Taassuma ilanngullugu oqaluttuaraa, elevhjemmimi allaffissorneq annikillisinneqartoq sulisut atuartunik ulluinnarni isumaginnittarnerat pitsaanerulissammat.

Ingerlatsivimmi pisortap oqarnera naapertorlugu elevhjemmimi sulisut kommunini allani elevhjemmit sulisuisuisa amerlaqatigimmatigit.

Taassuma erseqqissaatigaa, elevhjemmimi sulisut tallimat meeqqanik atuartunik sullitaqartut saniatigut tallimanik sulisoqartoq taakkua angerlarsimaffimmi suliassanik suliaqartartunik.

Elevhjemmimi pisortap Oline Augustunussenip apersorneqarluni oqaluttuaraa, sulisut marluk perorsaasutut ilinniarsimasuusut.

Jens Korneliussenillu isumaqatigaa, ilinniarsimasunik amerlanerusunik sulisoqalernissaq kissaatigineqarmat, ingerlatsivimmilu pisortap oqarnera naapertorlugu sulisussanik pissarsiniartoqartillugu ilinniarsimasunik qinnuteqartoqarneq ajortoq.

AAMMA ATUARUK Siusissukkut iliuuseqartoqarnissaa MIO-p ujartoraa