Ilisimasalik: Atornerlunneqarsimasoq ima oqaloqatigiuk

Meeqqat kinguaassiutitigut atornerlunneqarsimasut naalaarluarnerusariaqarpagut. Suliniummi Ullut Tamaasamik qulequtaqartumi tamanna oqariartuutaavoq.

AAMMA ATUARUK Ullut Tamaasa - meeraq naalaaruk

NAKUUSA, UNICEF suleqatigalugu, kinguaassiutitigut atornerluisarneq akiorniarlugu sapaatit akunneri aappassaat paasititsiniaavoq.

Meeraq taamatut nalaataqarsimasoq oqaloqatigiinnikkut qanoq ikiorneqarsinnaaneranik najoqqutassat videoliami saqqummiunneqarput. 

Malugeqqusinnaasut

Meeqqap ilaatigut uku ilisarnaatigisarpai:

- Pissusilersornerminiluunniit kamaqqajaasinnaasarpoq, soorlu uumilalluni, peqataarusunnani akerliuniaannavilluniluunniit. Aamma nikallungarpasilersimasinnaavoq, ilaminut akulerukkumajunnaarluni attaveqarniarnerminiluunniit matoqqalluni, Inuk Bourup-Nielsen erseqqissaavoq. 

Assersuutigaalu meeraq ima oqaloqatigeqqaarneqarsinnaasoq:

- Oqarfigalugu; 'Malugivara piffissaq kingulleq soorlu arlaannik oqaasissaqartutit immaqaluunniit allanngortoqartoq. Arlaannik oqaluttuarusukkuit uannut oqaluttuarsinnaavutit'.

Meeqqamut toqqissisimanartuussasoq

Meeraq qanilaassutsimik takutitsiffigissavat naalaaqqissaarlugulu, tarnip pissusaanik immikkut ilisimasalik oqarpoq.

- (Uagut inersimasut, aaqq.) meeqqap tatiginninnissaa, aamma inersimasumit innarlerneqarnikuummat, sanarfeqqaalaarlugu pisussaavugut.

Eqqaamalluguli meeqqap toqqissisimanissaa pingaaruteqarmat.

AAMMA ATUARUK Nakuusa kinguaassiutitigut atornerluisarneq akiorniarlugu suliniummik saqqummersitsisoq

- Meeqqat inersimasutuulli sivisuumik oqalorujuuginnarsinnaaneq ajorput. Taamaammat pinnguarnertalimmik, immaqa titartaarujoorluni pisuttuarujoorluniluunniit, tamanna aamma pisinnaavoq.

Oqaloqateqarnermi naammagittarnissaq pisariaqalersinnaavoq, meerarmi matoqqasuusinnaavoq.

- Uteqattaalaarlugu taanna, immaqa ullualuit ingerlaneranni uninngatilaariarlugu uteqqittarlugu. Taava meeraq tatiginnileruni toqqissisimalerunilu annississaqqaarpoq.

NAKUUSA-p videoliaa NAKUUSA-p facebookiani takuneqarsinnaavoq. Tamannalu pillugu
TV-kkut radiokkullu sapaatip akunnerini arfinilinni paasititsiniaasoqassaaq. 

Inersimasut meeraanerminni kinguaassiutitigut atornerlunneqarsimanertik pillugu oqaloqatiginnikkusuttut 141-mut sianersinnaapput.

Meeqqat inuusuttullu oqarasuaammut 134-mut sianerlutik sunaluunniit oqaloqatigiissutigisinnaavaat.