Eino Taunajik piviusulersaarut "Tsumu" pillugu: Neriuppunga inuusuttut piginnaasaat ersersinneqarnerulerumaartut
Eino Taunajik nuannaarluni tulluusimaarlunilu Københavnimi hotelimini filmiliaq "Tsumu" pillugu oqaluttuarpoq.
"Tsumu"-imi, kitaamiutoorlugu “Sumut”, inuttaasut pingaarnerit ilagaat. Piviusulersaarummi ikinngutigiit 21-nik ukiulik Eino Taunajik aamma 23-nik ukiulik Lars Korneliussen, tamarmik Tasiilameersut ikinngutinnaariittullu, malittarineqarput. Tasiilamiiginnassanerlutik illoqarfitsilluunniit qimallugu takorluukkatik piviusunngortinniarlugit allamut nuussanerlutik nalornissutigaat.
AAMMA ATUARUK Dokumentar om unge i Tasiilaq: Næste generation skal ikke opleve det, vi har oplevet
- Isumaqanngisaannarnikuugaluarpunga inuuninni taama misigisaqassallunga. Sapertutut misigiuaannarnikuullunga, sunaaffa taava sapernanga. Sunaaffa misigerusutakka piviumaguma taamaasa misigisinnaallugit, Eino Taunajik "Tsumu"-p takuteqqaarnera pillugu oqarpoq.
TSUMU - Where do you go with your dreams?
- Piviusulersaarut Københavnimi filmfestivalertoqarnerani CHP:DOX-imi marsip 25-ani takuteqqaarneqassaaq.
- Piviusulersaarut kammagiit Lars, Eino Thomasilu Tasiilami inuunerannut tunngassuteqarpoq.
- Taakku kammagiit pingasut inuusuttut allat peqatigalugit, Tasiiilami imminut toqunnermut, atornerluinermut akerliunerminnik takutitsillutik misigissutsit atorlugit isiginnaagassialiorput.
- Piviusulersaarummi Eino Larsilu ukiut marluk ingerlanerini ilitsersuisumit Kasper Kiertznerimit malinnaaffigineqarput, taakku namminneerlutik imminnut filmiliarisarlutik piviusulersarut suliarineqaraat.
- Larsi Einolu neriuuteqarlutik sukataarnermi saniatigut aamma nalornineq pigivaat: Tasiilaq qimassavaat imaluunniit Tasiilamiiginnassappat? Allamut nuukkunik ilaquttaasa ikinngutaasalu amigaatigilissavaat. Aallanngikkunilli allamik inuuneqalernissaminnik takorluugartik qatangiinnassaaq.
Taakku oqarput politikerit inersimasullu Tasiilami inuusuttunut tusarnaarnerunissaat pingaaruteqartoq, isumaqaramimmi taakku tusaaneqarneq ajortut. Erseqqissarpaat piviusulersaarut Tunumi illoqarfimmi ikinngutiminnut pigitillugu neriullutillu filmi inuusuttut amerlanerusut imminnut tatiginerulernissaannut aqqutissiueqataassasoq.
- Inuusuttut ammanerulernissaat neriutiginaqaaq, soorlu misigissutsit tungaasigut, imaluunniit filmi oqaasinnguinissamut neriuppunga angisuumik ammaassiumaartoq, imaluunniit periarfissanik tappinnerulernissamut, Eino Taunajik inuiaqatigiinni kalallini ilisimaneqarluareersoq oqarpoq.
2019-imi Naalakkersuisut kajumissaatitut nersornaasiuttagaannik nersornaaserneqarpoq, taannalu ukiut tamaasa inuusuttumut piginnaanilimmut tunniunneqartarpoq. Eino Taunajik nersornaaserneqarpoq imminut toquttarneq kinguaasiuutiitigullu innarliisarnerit, allerineqartartut/ qallisigeqqusaanngitsut, pillugit ammasumik sammigamigit, taakkulu Tasiilami isiginnaartitsinikkut sulinermigut takussusertarpai.
Eino Taunajiup aamma Lars Korneliussenip neriuutigaattaaq Tasiilami inuusuttut pillugit pigiliutiinnakkat, DR1-ip 2019-imi piviusulersaarusiaata qulequtaqartup "Byen, Hvor børn Forsvinder" takutinneqarnerata kingorna Tasiilami inuusuttut pillugit pigiliutiinnarneqarsimasut atorunnaarumaartut.
AAMMA ATUARUK Eino Taunajik nersornaaserneqartoq: Maajunnartutut taaneqartarpunga
Eino Taunajik suli Tasiilami najugaqarpoq, tassanilu inuusuttut isiginnaartitsisartut aallarteqqinnissaat sulissutigaa. Isiginnaartitsinikkut illoqarfimmi inuusuttut misigisat nasssatatik suliarisarpaat. Eino Taunajik nammineq isiginnaartitsisartunngorusuppoq, siunissamilu anguniakkani angorusullugu Danmarkimut nuunnissanimut piareersimalluni, naak Tasiilamiiginnarusukkaluarluni .
Lars Korneliussen Sisimiuni højskolerpoq, naammassiguniliu Tasiilamut uiternissani qilanaaraa.
- Tasiilami piginnaaneqartut piginnaanerisa takuleqqinnissaat neriuutiginaqaaq. Soorlu ammanerulerlutik aammalu nalunngilarput imminortoqartuaannartoq, tamanna annikillisarlugu piviusulersaarut pinaversaartitsissutitut aamma atorneqarumaartoq, Eino Taunajik oqarpoq.
