Efterskole-mi ilinniagaqarnersialersuinissaq oqallisigineqalersoq
Nunatsinni ilinniarnertuunngorniat Piareersarfinnilu ilinniartut ilinniagaqarnersiuteqartarput. Efterskolertulli ilinniagaqarnersiuteqanngillat. Saniatigut efterskolertut angajoqqaavi pisortanut akiliuteqartarput. Siunissami taamatut aamma ingerlariaaseqartoqassanersoq Inatsisartuni ullumi oqaluuserineqassaaq.
Inatsisartuni oqallisissiamik saqqummiisuupput Inatsisartuni Siumut sinnerlugu ilaasortat Ruth Heilmann aamma Anders Olsen.
- Angajoqqaat ilaat qitornartik efterskolernissaminut kajumikkaluartut nammineq pilersuisutut akissaalatitsineq peqqutigalugu tunuarsimaarfigisarpaat, allaammi akissaalatsisineq peqqutigalugu qitornamik kaasarfimmiussaanilluunniit pissaqartitsinatik, inuusuttortamillu illoqutigiit iluanni aningaasarsioqataanissaat orniginartinnerusarlugu, taama Inatsisartuni ilaasortat Ruth Heilmann aamma Anders Olsen nassuiaateqarput.
Efterskolertut angajoqqaavisa isertitaat malillugit naatsorsuutigineqarsinnaavoq atuartut 60 procentiisa atuartumut akiliut tamaat utertissinnaassagaat, taama Inatsisartut 2012-imut aningaasanut inatsisaanni allaqqavoq.
- Inuusuttut pikkorissaqqinnissaminnut kajuminnerat ajunnginnerpaamik aqqutissiunneqarnissaat taperserneqarnissaallu qisuariarfigissallugu pissusissamisoortutut isigaarput. Taamaattumik efterskolertarnerup akeqarunnaarnissaa ilinniarnermullu tapiissuteqarlernissaa misissuiffigineqartariaqartoq isumaqarpugut, inuusuttut tamarmik efterskolerusuttut assigiimmik periarfissikkumallugit, taama Ruth Heilmann aamma Anders Olsen oqallisissiaminni nassuiaapput.
