Edmonton Eskimoes atertik allanngortittussanngoraat

Edmonton Eskimoesikkut amerikamiut arsariaasiannik ukiorpassuarni arsaattartut nuannarineqarluartut atertik Eskimoeseqarunnaartittussanngorpaat.

Oqaatsip eskimuup nikassaarpasissuusinnaasarnera taamaaliornerannut peqqutaavoq. Nunatsinni, Canadami Alaskamilu nunap inoqqaavinit kingoqqisut amerlanerpaartaat naggueqatigiit inuit-mik taaneqarusunnerusarput.

- Peqatigiiffipput kattuffippullu ukiut 100-t sinnerlugit matuma siorna taama atseratsigulli Issittormiut immikkut ittumik anersaaqarnerat qanimaatsuunerallu pillugit nersorpavut, Edmonton Eskimoesikkut ilisimatitsipput. 

Allamilli ateqalertussanngorput. 

Naggueqatigiit inuit suliniaqatigiiffianni Inuit Tapiriit Kanatami siulittaasoq, Natan Obed, Edmonton Eskimoesikkut atiannik isornartorsiuisunut ilaavoq. 

Naggueqatigiit inuit inuussutissarsiutigalugu timersortartut peqatigiiffiinit nikassaataajunnaarnissartik piumasarigaat, taanna aviisimut Globe and Mailimut oqarpoq. Inuiaat taaguutaasa atsiinermi atorneqartarnerat assuarnartuusoq, taanna isumaqarpoq. 

AAMMA ATUARUK Siku pillugu: Atiata allanngortinneqarnera ajunngilaq, eskimoli aamma ajorisassaanani

Amerika Avannarlermi tamarmi nunap inoqqaavinit kingoqqisut amerlanerpaartaat oqaatsit soorlu "eskimooq" aamma "aappaluttumik amillit" atorneqartarnerannut akerliusut, Natan Obed oqarpoq.

- Nunap inoqqaavinit kingoqqisut inuiaat taaguutaasa atsiinermi atorneqartarnerannik itsarpaluginnittunik, mamianartuusorinnittunik allannguisoqartariaqarsorinnittunillu ilarpassuaqartut maluginiarparput.

- Taamaaliortoqartarnerami saammaateqatigiinnissamut akornutaammat, Natan Obed oqarpoq.

Edmonton Eskimoesikkut tamanna naggueqatigiit inunnut peqatigiiffimminnullu aningaasaliisartunut tusarniaassutigileruttoritsik Natan Obedimut tamatuma kingorna ilisimatitsissutigaat.

AAMMA ATUARUK Sikunik nioqqutissiortup Hansens Is-ip sikuliani Eskimo allamik atseraa

Edmonton Eskimoesikkut atiat maannamiit eskimoortaqarunnaassasoq taakkununnga aningaasaliisartut pingaarnerpaat ilaat Belairdirect oqartoq, aviisi Globe and Mail allappoq.

Edmontonikkut atiminnik allannguisutuaasussanngunngillat, timersoqatigiittartummi allat atiminnik allannguinissaminnik aamma aalajangersimammata.

Pineqartut tassaapput Washington Redskinsikkut, USA-mi amerikamiut arsariaasiannik arsaattartuni siuttut arsaateqattaarnerini NFL-imi unammeqataasartut.

Oqaaseq "aappaluttumik amillit" Amerikami nunap inoqqaavinit kingoqqisunut nikassaassutaarpaluttuusoq, USA-mi inuit amerlasuut isumaqarput.

Edmontonikkut atertaassaminnik aalajangiinissaasa tungaannut Edmonton Football Teamimik ateqarallassapput.