Dronning Mary Namminersorlutik Oqartussanit nersornaaserneqartoq

Namminersorlutik Oqartussat nunatsinni ataqqinaatit annersaannik Dronning Mary meerartatta inuusuttattalu atugaat pillugit ukiorpassuarni suliaqarnera pillugu nersornaaserpaat.

Allattoq Lærke Schmidt Fallesen

juunip 05-at 2024 09:14

Nutserisoq Hanne Petersen

Dronning Mary Namminersorlutik Oqartussanit ippassaq marlunngornermi nersornaaserneqarpoq. Nersornaatinnattaava kuultiusoq tassaavoq Nersornaat, taannalu Namminersorlutik Oqartussat ataqqinaatitut nersornaasiuttagaanni annersaraat.

Inatsisartut siulittaasuat Mimi Karlsen (IA) nersornaammik taassuminnga kunngikkormiut illussaarsuanni Frederik VIII’s Palæmi Københavnimi Amalienborgimiittumi tunniussisuuvoq.

Dronning Mary “Kalaallit Nunaanni meeqqat inuusuttullu atugaat pillugit ukiorpassuarni suliaqarnini pillugu nersornaaserneqartoq," kunngikkormiut nittartakkaminni allapput.

- Ataqqinartorsuaq Dronning Mary, kunngissap nuliatut maannalu kunngip nuliatut atuunninni, meeqqat akornanni pimmatiginnittarneq akiorniarlugu suliniuteqarnermi qulequttanilu paquminarsinnaasuni allani, soorlu inuttut aliasuuteqarnernik suliarinninniarnerni imaannaanngissinnaasuni, pimoorussilluartarnerit takutissimavat.

Mimi Karlsen oqalugiarami ilaatigut taama oqartoq, Inatsisartut Siulittaasoqarfiata tusagassiorfinnut nalunaarutaanni allaqqavoq.

Mary Frederiup januaarimi kunnginngornerani dronninginngorneranut atatillugu Inatsisartut siulittaasuannit nersornaaserneqartoq, Inatsisartut Siulittaasoqarfiata tusagassiorfinnut nalunaarutaani allaqqavoq.

NERSORNAAT

Nersornaasiunneqartartoq saqqarmiuuvoq nersornaat.

Taanna Inatsisartut siulittaasuannit tunniunneqartarpoq.

Nersornaat innuttaasunut tamanut nunatsinni piffissami sivisuumi pingaarutilinnik suliniuteqarsimasunut nersortarialinnut tunniunneqartarpoq, tamatumanittaaq kalaallit oqaasii, kulturiat, isigineqarnerallu pillugu annertuumik nersortarialimmik suliniuteqarsimasumut tunniunneqarsinnaavoq.

Nersornaat guldtiusoq sølviusorlu nersornaasiissutigineqartarput.

Nersornaat guldtiusoq ukiumut ataasiaannarluni tunniunneqartarpoq.

Nersornaat sølviusoq annerpaamik ukiumut tallimariarluni tunniunneqartarpoq.

Allisiguk

Kunngikkormiuni nunatsinnit kultiusumik nersornaasikkat arlaqartut

Sølviusumik kuultiusumillu Nersornaateqarpoq, dronning Maryllu nersornaatinnattaava nunatsinni ataqqinaatit annerpaartaaraat.

Dronning Mary kunngikkormiuni Nersornaammik kuultiusumik nersornaasikkani siulliunngilaq. Uia kunngi Frederik qulingat 2004-mi assinganik nersornaaserneqarpoq, aamma dronning Margrethe prins Henrillu assinganik aamma 1989-imi 2003-milu nersornaaserneqarput.