Dronning Margrethep 80-iliinerminut atatillugu nalliuttorsiornissani taamaatiinnaraa

Dronning Margrethep 80-iliinissaminut atatillugu nalliuttorsiortoqarnissaa coronavirus pissutigalugu taamaatiinnarpaa.

- Danmarkip ulluni makkunani unammilligassai eqqarsaatigalugit tamatta akisussaassuseqarluta ikioqatigiittariaqarpugut, immitsinnut paaraluta. Naalakkersuisut oqartussallu allat nualluummut innersuussutaasa malinneqarnissaat kaammattuutigissavara, Dronning Margrethe tusagassiutinut nalunaarummi ilaatigut oqarpoq.

Kalaallit meerartaat balletimik isiginnaartitsisussaagaluartut

Naalagaaffimmi dronningip 80-iliilluni apriilip ulluisa 16-ianni inuuissiornissaanut atatillugu pisussarpassuaqaraluarpoq, inuuissiornissaanut atatillugu, inuuissiornerani, inuuissioreerneranilu pisussarpassuaqaraluarluni.

AAMMA ATUARUK Kunngissakkut Schweizimiit coronavirus pissutigalugu angerlajaartut

Illussaarsuup Amalienborgip saavani slotspladsiminngaanniit pisarneq malillugu pilluaqqusineq taakkununnga ilaavoq, Københavnimilu Tivolimi balletimik isiginnaartitsinissaq, kalaallit, savalimmiormiut qallunaallu meerartaasa ilaat balletimik tassani isiginnaartitsisussaagluarlutik.

Dronningilli inuuissiorneranut atatillugu pisussarpassuit maanna tassa taamaatiinnarneqartut, kunngikkormiut nalunaarutigaat.

Kunngikkormiut aaqqissuussanut peqataanissatik taamaatikkaat

Dronningip taamaatitsinerminnik nalunaaruteqarnertik iluatsillugu inuiaqatigiit ikioqatigiinnissaannut suleqataasut tamarmik qutsavigai.

AAMMA ATUARUK Nakorsaaneq corona pillugu: Peruluttut amerlavallaalissappata unammillernassaaq

- Danmarkimi peqqinnissaqarfimmi sulisut, oqartussaasut, ornittakkat, suliffeqarfiit inuillu ataasiakkaat Danmarkimi ataqatigiittoqarnissaanik tapersersoqatigiittoqarnissaanillu pisariaqartitsoqarnerani qanoq iliornissamut piumassuseqarluarntut isumassuilluartullu qamannga pisumik qutsavigerujussuarpakka, dronning allappoq.

Kunngikkormiut piffissami qaninnermi aaqqissuussanut pisortatigoortumik peqataanissatik aamma taamaatiinnarpaat.