Nakorsaaneq corona pillugu: Peruluttut amerlavallaalissappata unammillernassaaq

Coronavirusip tuniluutinnginnissaa siunertaralugu peqqissuseq pillugu oqartussat suliniuteqarput. Nualluut nunatsinnut apuutissappat tuniluutilertunnginnissaa taamaalillunilu peqqinnissaqarfiit artukkerneqannginnissaat siunertarineqarluni.

- Piffissap sivikitsup ingerlanerani peruluttut immikkut ikiortariallit amerleriasaarnissaat aarlerinartoqartipparput. Amerlasuunummi inissaateqanngilagut, Nunatsinni nakorsaaneq Henrik L. Hansen oqarpoq.

Peruluttut qassit inissaqartinneqarnersut nakorsaanerup maanna oqaatigisinnaannginnerarpaa. Peqqinnissaqarfiup Qullersaqarfianut saaffiginneqqusivoq.

Peqqinnissaqarfiulli Qullersaqarfia KNR-ip saaffiginnissutaanut qisuariaateqanngilaq.

Peruluttut Nuummi Danmarkimiluunniit peqqissarneqassasut

Coronavirusi nunatsinni siaruapallassagaluarpat peqqinnissaqarfik artukkerneqarsinnaanera aarlerinartoq peqqissutsimut naalakkersuisup Martha Abelsenip pingasunngormat tusagassiortunik katersortitsinermi oqaatigaa.

AAMMA ATUARUK Innersuussutit nutaat: Nunatsinnit nunatsinnullu angalasoqarnaveersaartoqarli

Inuit immikkut aarlerinaateqarsinnaasut peqqinnissaqarfimmut artukkiisinnaapput, taakkumi nunatsinni peqqissarneqarsinnaanngillat. Nunatsinnilu najugaqarfiit siammasissuuneri aamma unammillernartunut ilaasut nakorsaanerup eqqaavaa.

- Immikkut ilisimasalinnit Nuummiinnaq katsorsaasoqarsinnaavoq, tamannalu unammillernarsisinnaavoq. nakorsaaneq oqarpoq.

Nuup avataani napparsimaveqarfiit inissatai atortorissaarutaalu killeqarput. Peqqissarneqartussallu amerlavallaalissagaluarpata Danmarkimut aallartitsisoqartassasoq Henrik L. Hansen oqarpoq.

Danmarkimi pisortat sullissinerat ippassaq unitsinneqarput, pinartuunngitsumillu suliallit sapaatit akunneri tullii marluk angerlarsimaannassallutik. Danmarkimilu coronavirusimik aamma unamminartorsiorpoq. Kalaallinillu peruluttunik Danmarki ikiuussinnaanngeriasaarnissaa nakorsaanerup takorlooruminaatsippaa.

Pinaveersaartitsineq aallunneqassaaq

Inuit nappaalatillugit aamma taamaattoqarnikuunngisaannartoq nakorsaanerup erseqqissaatigaa.

Ingasattajaartoqassanngilarli. Peqqissuseq pillugu oqartussammi peqqinnissaqarfiit artukkerneqaqqunagit nualluutip tuniluutilertunnginnissaa anguniarlugu suliniuteqarput. Assersuutigalugu angerlarsimaannaqqusinerit.

AAMMA ATUARUK Kommunit coronavirusimik siaruatsaaliuinerminni sulitilluni angalanissat tamaatikkaat

- Nualluutip inuiaqatigiinnut siaruaatipallannginnissaa qukkeerniarsaraarput. Taamaaliornikkut ataatsikkut nappaalasorpassuaqalernissaa pinngitsortissinnaagatsigu, nakorsaaneq oqarpoq, nangipporlu:

- Taamaalilluta peruluttunut inissaqartitsinissaq qulakkeersinnaagipput upperilluinnarpara, nakorsaaneq Henrik L. Hansen oqarpoq.