Dronemik ujaasineq iluatsinngitsoortoq: Angut Sisimiuneersoq periarfeeruttoq suli maqaasineqarpoq
Sisimiuni politiit 63-inik ukiulik Josef Christiansen sapaatit akunnerata siulianili periarfeeruttoq timmisartuaqqamik ungasianiit aquttakkamik, tassa dronemik sisamanngornermi ujaaraat.
Josef Christiansen Sisimiuni napparsimmavimmiit januaarip 24-ani ullaap tungaani anisoq kingullermik takuneqareerluni periarfeeruppoq. Taamaammat politiit Sisimiuni innuttaasut angut taanna nassaarineqaqqullugu quit, illut naqquisa ilaanni toqqorfiusinaasulluunniit ilaanniinnersoq misissueqquaat.
Josef Christiansen 170 aamma 175 centimeterit missaannik angissuseqarpoq, tuattuuvoq aappalorujuttunillu nujaqarluni. Josef Christiansen kingullermik takuneqarami politiit paasissutissaataat naapertorlugit napparsimmaviup atisaanik atugaqarpoq, qarlippaaqarpoq qernertumillu qiviunik oqorsaasikkamik naatsumik qaatigooqarpoq.
Josef Christiansen dronemik ujaareqqissanerlugu suli aalajanginngikkitsik, politiit tallimanngornermi ullaakkut ilisimatitsipput.
Josef Christiansenimik takunnissimasut taassumaluunniit sumiinneranik ilisimannittut 701448-mut sianerlutik politiinut attaveqaqquneqarput.
