Doris tusarnaartitsinermut akerliuvoq

Nipilersortartut taakku Greenpeacep aaqqissugaanut maajip 16-ianni pisussamut taaguutilimmut Save the Arctic-imut peqataaniarnerat, taassuma akuerisinnaanngilaa, matumanimi avatangiisinik illersuiniaqatigiiffiup Issittumi uuliamik ujaasilluni qillerinissamut akerlilersuinerujussua, matumani Nunarput ilanngullugu, pineqarmat.

Uuliamik ujaasilluni qillerinernut akerlilersuineq, pissuserissaarnissamik isummat uniorlugit ingerlatsinerusoq, Doris Jakobsen isumaqarpoq.

- Danmarkimi Greenpeacekkut qallunaanik nipilersortartunik suleqateqarlutik koncertertitsiniarput, Nunatsinni uuliasiornermut akerlilersuinissaq siunertaralugu. Taamaammat qallunaanut nipilersortartunut Greenpeacekkunnullu allagaqarpunga aamma taakkua eqqarsarteqqikkusullugit. Tassami ilisimavarput qallunaat ukiut 50-it ingerlanerini Nordsømit aningaasatigut isaatitaqartut. Taamatut illuinnaasiortumik iliuuseqartoqarnera isornartorsiorpara. Taava aamma isumaqarama Greenpeacep Nunarput piniarnikkut innarlereernikuullugu aamma siunissatsinnik ingerlatitsiniarnerput aamma innarlerniarsarimmagu akuersaarsinnaannginnakku, Doris Jakobsen Radioavisimut oqarpoq.

- Isumaqarpunga Greenpeacekkut massakkut taamatut pisuussutitsinnik atuiniarnitsinni akerliuniarnerannut, illuatungiliulluni qinikkatut saqqummernera pissusissamisoortoq. Aamma Nunatta ineriartornissamik pisariaqartitsinera qallunaanut nipilersortartunullu kiisalu Greenpeacekkunnut eqqarsalersitsisinnaammat, Doris Jakobsen oqarpoq.

Doris Jakobsen nipilersortartunit suli akissutisinngilaq. Taamaattorli nipilersoqatigiit Magtens Korridorer aviisimut Politikenimut qaammammi kingullermi ima oqarput:

- Paasisitsiniaanermut matumunnga nipilioqataalaarusukkatta, pineqartormi tamatsinnut attuisuuvoq, meeqqatsinnut nunarsuatsinnullu.

Doris Jakobsenip allakkani ima naggaserpai:

"Taamaammat iluunngarma kissaatigaara matumani Greenpeacemut tapersiinersi eqqarsaatigilluassagissi, Greenpeacemut aningaasat katersuiniaqataaffigisasi, ilaatigut inuiaqatima kannguttaatsuliorfigineqarnerannut atorneqartussaammata".

Taamaattorli tusagassiuutinit sammineqarnissaq Doris Jakobsenip anguniarini aamma nassuerutigaa.

- Nunarput assersuutigiinnarlugu piniarnikkut Greenpeacemit innalerneqarnikorujussuuvoq. Taamaattumik piffissami kingullermi akerliussutsimik Danmarkimi takutitsivugut, qujanartumillu tusagassiortorpassuarnit soqutigineqarpoq. Taassuma aamma kingunerivaa, qallunaat aamma Danmarkimi tunisassiortut paasinninnerunerat. Aamma isumaqarpunga Greenpeacekkut taamatut uagut pisuussutitsinnik atuiniarnitsinnut akerliuniarnerannut illuatungiliulluni qinikkatut uannit saqqummerneq pissusissamisoortoq aamma eqqarsalersitsisinnaammat qallunaanut aamma nipilersortartunut Greenpeacekkunnullu, Nunarput ineriartornissaminik aamma pisariaqartitsisoq, Doris Jabsen naggasiivoq.