Doris: Pituffimmut tunngasoq Nunatta Danmarkillu ilinniarfigaat
KØBENHAVN: Exelis Servicemik isumaqatigiissutip sivikillineqarnissaanik amerikamiunik isumaqatigiinniarneq Siumumeersup Doris Jakobsenip tusaatissatut tiguaa. Suliap Folketingimi matoqqasumik isumasioqatigiissutigineqarnerata kingorna KNR-imut taama oqarpoq.
- Soorunami oqarsinnaanngilanga naammagisimaarlugu, soorunali neriuutigaara nunanut allanut tunngasunut ministerip Martin Lidegaardip oqarneratut - sivikillineqarsinnaasoq.
Taannali isumaqarpoq naalagaaffeqatigiit illuatungeriillutik pisoq ilinniutigisimagaat - soorlu politikikkut USA-mik isumaqatigiissutini amerikamiut Kalaallit Nunaanniinneranni akileraarutitigut isaatitsissutigineqarsinnaasut pillugit.
- Isumaqarpunga Danmark Kalaallit Nunaallu silatunerulersimasut. Isumaqarpungalu taamatut kukkusoqaqqissanngitsoq. Eqqarsaatigineqartariaqarpormi Hans Enoksenip nalaani Itillimi isumaqatigiinniartoqarsimasoq, Josef Motzfeldtillu nalaani Igaliko-mi isumaqatigiissuteqartoqarsimalluni. Taamanikkut amerikamiut akileraartarnissaat ilisimaneqarsimanngilaq. Taamaattumik isumaqarpunga Kalaallit Nunaat silatunerulersimasoq, Doris Jakobsen isumasioqatigiinnerup kingorna KNR-imut taama oqarpoq.
Doris: Pituffik pillugu suliaq Siumup pisuussutiginngilaa
- Illimmi naalakkersuisuutitaqarnerpit nalaani makku pisimapput. Ilisimavarpummi Namminersorlutik Oqartussani naalakkersuisoqarfinni pisortaanerit makku ilisimasimagaat. Naalakkersuisulli siulii makku pillugit qisuariarsimanngillat?
- Hans Enoksenimi taamani aamma Siumuuvoq. Isumaqarpunga Siumut kisimi pisuutinneqarsinnaanngitsoq, Doris Jakobsen oqarpoq.
- Tamakku pinerini ilissi Aleqap nalaani naakakkersuisuuvusi?
- Tassami - soorlu oqareersunga, ukiuni arlaqartuni amerikamiunit akileraarutit annaasimavagut. Aamma Aleqap siornatigut. Taamaattumik isumaqarpunga partiit assigiinngitsut pisuusut. Siumut kisimiinngisaannarsimavoq. Naalakkersuisooqateqartuaannarsimappummi.
- Partiinili ilissi siuttuusimavusi?
- Akisussaaffik aamma qimarratiginianngilara. Naalakkersuisunimi siulittaasorput Kim Kielsen aamma oqarnikuuvoq - tassa inatsisilerituunik misissuititsisoqartoq - namminerlu akisussaatinneqaruni akisussaaffik tiguniarlugu. Taamaattumik akisussaaffik qimarratiginngilarput, KNR-imut taama oqarpoq.