Doris missilinut illersuut pillugu paasissutissanik ujartuivoq
Amerikamiut qaartartunut igeriuttakkanut illersornissamut upalungaarsimanissamut pileraarutiminnut nutarterinissaminnut atatillugu, Pituffimmi sakkutooqarfimmut sunik pilersaaruteqarpat?
Siumup folketingimi ilaasortaatitaata Doris Jakobsenip tamanna akissutissarserusuppaa.
Taassuma tusagassiuutinut nalunaarummini oqaatigaa, Danmarkimi illersornissamut ministeri tamatumunnga tunngasumik aallaqqaammut apeqquteqarfigigaluaramiuk paasisaqarpallaarani.
- Danmarkimi illersornissamut ministerip uannut akissummini ilisimatitsissutigaa, Amerikamiut Pituffimmi nutarteriniarnerannut ilisimasaqarani, naak misissueqqissaarnerni arlalinni oqaatigineqaraluartoq, Amerikamiut qaartartunut ungasissunut igeriuttakkanut nutaamik illersuusiorniarnerannut atatillugu, qaartartunut ungasissunut igeriuttakkanik amerlanerusunik Amerikami Avannarlermi inissiinissaq pisariaqartinneqartoq, Doris Jakobsen allappoq.
Taamaattumik taassuma Amerikamiut qaartartunut ungasissumut igeriuttakkanut pilersaarutaannut atatillugu, Kalaallit Nunaat qanoq inissisimanersoq, Amerikami qullersanut apeqqutigaa.
- Pilersaarutit pillugit Danmarkimi oqartussat ilisimatinneqarsimagunanngimmata, tamanna Amerikamiunit paasisaqarfigerusuppara. Taamaattumik tamanna pillugu Amerikamiut illersornissamut ministeriat toqqaannartumik allaffigaara, Doris Jakobsen allappoq.
Taassuma Pituffimmi sakkutooqarfiup siunissaa pillugu Nunatsinni oqartussat ilisimatinneqarnissaat qulakkeerusuppaa, matumanimi kalaallinut suliffiit aamma kalaallit suliffeqarfiinut attaveqarnerit pineqarmata.
