Doris Jakobsenip IA suleqatigerusuppaa

- Ullumikkut inuiaqatigiit avissaaqqasorujussuupput, tamannalu allanngortissagutsigu partiit annerit suleqatigiittariaqarnerat avaqqunneqarsinnaanngilaq. Inuiaqatigiit toqqissinissartik massakkut pisariaqartippaat, tamannalu pisinnaavoq qinersinerup kingorna partiit anginerit marluk suleqatigiissinnaappata, Doris Jakobsen allappoq.

Inuussutissarsiornikkut ineriartortitsinissaq sammineqartariaqarsoraa

Qinersereernerup kingorna isumaqatiginninniarnissani qulequttat pingaartitani pingasut Doris Jakobsenip saqqummiuppai, tassaallutillu: Aatsitassarsiorneq, aalisarneq takorniariaqarnerlu. Ilinniartitaaneq, inunnillu isumaginninnermut tunngasut.

AAMMA ATUARUK Doris Jakobsen Siumumi siulittaasunngorusuppoq

- Inuussutissarsiornikkut ineriartortitsineq sammineqartariaqarpoq, aningaasanik nutaanik isertitsinissamut pisariaqartitsivugut, aamma suliffissanik nutaanik pisariaqartitsivugut, taamaammat GA, SIK, NuSuKa ilaalu ilanngullugit suleqatigilluarneqartariaqarput, Doris Jakobsen, siulittaasussatut sassarnermini pingaarnertut anguniagassaminik saqqummersitsinermini ilaatigut allappoq.

Sermeersuumik suleqateqarneq nikittorsaqqinneqartariaqarsoraa

Kommuneqarfik Sermersuup kommunillu akornanni piffissami kingullermi pisimasut, Doris Jakobsenip aamma eqqaavai:

- Ajoraluartumik ullumikkut Siumut Nuuluartutut isigineqarpoq, sinerissami illoqarfinnik nunaqarfinnillu allanik salliutitsinerar tunngavigalugu. Isumaqarpunga, Nunatsinni illoqarfiit pingaarnersaannik peqarnerput eqqaamaneqartariaqartoq kommunimillu suleqateqarneq nukittorsaqqinneqartariaqartoq sinerissamiittut allat pilliutiginngikkaluarlugit, Siumumi siulittaasussatut sassartoq Doris Jakobsen allappoq.

AAMMA ATUARUK Kielsen Siumut siulittaasussaatut sassarpoq