Doris Jakobsen: Pituffik pillugu tamakkiisummik ilisimatinneqartariaqarpugut
Tamanna pivoq nunanut allanut tunngasunut ministerip Dansk Folkepartiimeersup Søren Espersenip apeqqutaanut ima akissuteqareersorlu:
"Qallunaat kalaallillui Naalakkersuisuisa amerikami naalakkersuisut ataatsimeeqatigisarsimavaat - ataatsimoorlutik - aamma immikkoorlutik."
Doris Jakobsen isumaqarpoq tamanna isornartoqartoq:
- Kalaallit Nunaat avaqqullugu Danmark USA-mik pisaq pillugu isumaqatigiissuteqarsimappat, assut ilungersunarpoq. Neriuppungalu taamaattoqanngitsoq. USA-mummi piumasaqarnitsinni immitsinnut pisariaqartippugut.
- Tamannalu pillugu pisariaqarluinnarpoq, isumaqatigiinniarnerit pillugit tamakkiisummik ilisimatinneqarnissarput. Taamaanngippat nunanut allanut tunngasutigut soqutigisagut Danmarkip akisussaassusilimmik suliarinerai naatsorsuutigisinnaanngilarput.
Doris Jakobsenilli isummerfigerusunngilaa, Kalaallit Nunaata Danmark peqataatinnagu amerikami naalakkersuisut ataatsimeeqatigisimanerai, naak Pituffimmut tunngasut qallunaat illersornissamut oqartussaaffiisa iluaniikkaluartoq.
Aamma atuaruk Doris Jakobsen Folketingimut uteqqippoq
Martin Lidegaardilli akissutaani oqaatigineqanngilaq, Danmarkip USA-llu ataatsimeeqatigiittarneri pillugit Nunarput ilisimatinneqartarsimanersoq.
Akerlianilli nunanut allanut tunngasunut ministeri ima ersarissumik allappoq:
"USA-mik isumaqatigiinniarnermi aalajangiinermi tunngaviusut Danmarkip Kalaallit Nunaatalu akuerinikuuaat. Aalajangiinermi tunngaviusut allakkatigut attaveqatigiinnermi uppernarsarneqarput decembarimi 2013-imi."
Imaassappat Namminersorlutik Oqartussat - naalakkersuisoqarfiit arlaata - aalajangiinermi tunngaviusut ilisimasimappatigit, Inatsisartunut Naalakkersuisunulluunniit saqqummiussimanagit, taava tamanna kinguneqartinneqassava?
- Tamanna oqaaseqarfigerusunngilara. Oqareernittut Pituffik pillugu Naalakkersuisuusimasut Danmarkillu ataatsimeeqatigiittarsimaneri ilisimanngilakka. Naalakkersuisulli una pillugu qallunaat naalakkersuisuinik isumaqatigiinniartussaapput. Tamanna akuleruffigerusunngilara, Doris Jakobsen oqarpoq.
Qallunaat nunanut allanut tunngasunut ministeriat ullumi oqaaseqartissinnaasimanngilarput.
