Donnas Dyreklinik oqarasuaatikkut sioorasaarneqartoq

Donnas Dyreklinik Nuummi qimmimik piginnittumik kamssimasumik ataasinngornermi ualikkut sianerfigineqarnerata kingorna matuvoq.

Oqarasuaatikkut ataasinngornermi sianertup nipaa pissutigalugu sulisut toqqissisimajunnaarmata klinikkimik piginnittup, Tom Amtofip klinikki ullup sinnera matuaa.

- Sulisukka paariniarlugit aalajangerpunga, taanna oqarpoq.

Oqarasuaatikkut oqaloqatigiinneq qimminik nakkutilliisup Nuup ilaani Nuussuarmi qimmeq qullersuarmut pitoqqasoq pillugu sapaatip akunnerata matuma siorna ilisimatinneqarneranik aallaaveqarpoq. Taassuma qimmeq Nuummi uumasut ineqarfianukaassiniarluni aalajangerpaa, tassanilu taanna maanna paarineqarpoq.

Pisoq qimmip piginnittuata sakkortuumik qisuariaateqarfigaa, taamaammat Tom Amtofip klinikki ataasinngornermi ualikkut matugallarniarlugu aalajangerpaa.

- Qimminik nakkutilliisutut 2017-imili suliaqalerpunga, suliassannillu suliaqaraangama sioorasaarneqarlungalu taava tamanna politiinut unnerluutigineqassaaq. Politiinut unnerluutiginnereerpunga, politiillu angut oqaloqatigereerpaat, taamaammat ullumikkut nalinginnaasumik ammassaagut, Tom Amtoft oqarpoq.

Tomip ukiuni arfineq-marlunni qimminik nakkutilliisutut suliaqartarneranni politiillu ilanngutitinneqartarneranni pisoqaalussimavoq. Politiit unnerluussummik ippassaq tigusaqarsimallutik marlunngornermi ullaakkut uppernarsarpaat, taakkuli suliamut atatillugu annerusumik oqaaseqarsinnaanngillat.