Iranimut iliuusissat sakkortuut nutaat Donald Trumpip atsiorai
Immikkut iliuutsit sukannersut Iranip siuttuanik Ayatollah Ali Khameneimik eqquinissaat siunertaavoq, Iranillu USA-p timmisartuaraanik inuttaqanngitsumik, ungasianiillu aqunneqarsinnaasumik, qanittukkut nakkartitsineranut USA-mit qisuariarnerulluni. Immikkulli iliuutsit sukannersut qanorluunniit pisoqarsimagaluarpalluunniit eqqunneqassagaluartut Trumpip ilanngullugu oqaatigaa.
Iranimut iliuusissat eqqunneqarnissaat, Iranip USA-p timmisartuaraanik nakkartitsinnginneraniilli pilersaarutigineqareersut, USA-p aningaasaqarnermut ministeriata Steven Mnuchinip oqaatigaa.
Iranip pigisaasa milliardilikkaanik nalillit USA-miittut tigusiffigineqaqqusaajunnaarsinneqarput.
Iranip USA-mit sukannersumik iliuuseqarfigineqarnera Iranimiunit aamma qisuariarfigineqarpoq, Iranip USA-llu naalagaaffittut attaveqarnerat imungarsuaq kipitinneqassasoq oqaatigineqarluni.