Ukiunit siuliinit nersussuit aattukkat maannakkut marloriaatinngorsimapput

Nersussuit Sofus aamma Suka Frederiksenip nunaateqarfiannit Narsap iluanit aammalu Niels Lundip Qanisartuuni nunaateqarfianeersuupput.

- Ukiunit siuliinit nersussuit aattukkat maannakkut marloriaatinngorsimapput qilanaarpugullu pisinianut neqit pitsaasut neqeroorutigisinnaanngussagatsigit, taama oqarpoq Kalaallit Nunaanni Brugsenimi niuernermik aqutsisoq Brian Weuge Chemnitz.

Nersussuillu neqaata piffissami qaninnerpaami  pisiniarfimmiilernissaat naatsorsuutigineqarpoq.
 
- Neqi taamaattoq alaatsinaaffigiuk. Pitsaalluinnartuuvoq. Nersusssuit taakku pinngortitaassuseq malillugu kinguaassiortitaapput piumaneqarluarlutillu. Aammattaaq nersussuit neqai taakku allanut naleqqiullugit orsukinnerujussuupput, Brian Weuge Chemnitz oqarpoq.
 
Brugsenip pisiniarfiini neqaarniarfittaqanngitsuni nersussuit neqai pineqartut qerisutut pisiarineqarsinnaaneri ukioq manna periarfissaajumaarpoq.