Disko Line akerliliilluni akissuteqartoq

Ingerlatseqatigiiffiup pisortaata Finn Hansenip allagaqarluni isornartorsiuineq akerlilerpaa. Kommune Kujalliup pissutsit Kiista P. Isaksenip isornartorsiugai pillugit Disko Linemut saaffiginnissuteqarsimannginnera ilaatigut paasiuminaatsippaa.

- Taamaakkaluartoq isornartorsiorneqarnerput aallaavigalugu akissuteqarnissamut pisussaaffilerpugut ilaatigut isornartorsiunerup aallaaviata tutsuviginassusia apeqquserlugu, Finn Hansen taama allappoq.

Kiista P. Isaksenip ilaatigut oqaatigaa qulimiguulimmik angalasussat qularnaatilinnik tunngavilersuuteqarluni imaatigut angallammik angalasussanngortinneqartartut, ingerlatseqatigiiffiullu aamma allakkat nassiussallu ingerlanneqarnerat kinguaattooruteqartikkaa.

AAMMA ATUARUK Kujataani borgmesteri ilaasunik angallassinermut aaqqiisoqaqqusisoq

Tamannalu Finn Hansenip ilumuunnginnerarpaa. Taanna allappoq angallassinerit isumannaatsumik ingerlanneqarsinnaanersut taamaatinneqassanersulluunniit timmisartortartup angallatilluunniit naalagaata kisimi akisussaaffigigaa:

- Helikopterip aallarnissaa taamaatinneqartillugu, Disko Linep sulisuisa ilaasut neqeroorfigisarpai angalanerat angallammut nuunneqarsinnaasoq, tamannali kissaatigineqanngippat angalaneq taamaallaat ingerlaqqissinnaavoq helikopterip aallarnissamut inissalimmut tullermut. Tamannaavorlu angalasussap naggataatigut nammineq aalajangigassaa, Finn Hansen taama allappoq.

Finn Hansen naapertorlugu allakkat nassiussallu angalanermut periarfissaasumut siullermut nassartinneqartartut, tamannalu tigunerinit ullut 1-3-it iluanni pisartoq.

Pisortalli Disko Linep aallartinnerliorsimanera aamma nassuerutigaa, tamannalu Disko Linep Kujataani ilaasunik angallassilernissaa ullualunnik sioqqullugu kiffartuussinissamik isumaqatigiissutip atsioqatigiissutigineqarsimanerajik pissuteqartoq.