Aatsitassarsiorneq pillugu Canadami nittarsaassineq Aningaasat kingusinnerusukkut isaajumaarput
Qallunaalli suliffeqarffissuisa kattufianniit, DI-miit, arktiske Råstofklyngemiillu peqataasut nittarsaassinersuup ulluani kingullermi naapikkatsigit angusat ilorrisimaarpgaat
- Naatsorsuutigisanit pitsaanerusoraakka. PDAC-mi ukiut sisamassaanik peqataavugut ukioq mannalu allartitaasugut aatsaat taama amerlatigaagut.
AAMMA ATUARUK Aatsitassat pillugit nittarsaassinersuarmut Nunatsinnit peqataasut aatsaat taama amerlatigisut
DI-mi siunnersorti, taavalu DTU-p, DI-p Nunatsinnilu Sulisitsisut suleqatigiissutigisarisaanni, Aktisk Klyngemii allattoqarfimmi pisortaq, Mads Quist Frederiksen taama oqarpoq.
- Ukioq mannalu peqataaneq ukiunut allanut sanilliullugu allarluinnaavoq. Nittarsaassiviup ammarneraniit inuppassuaqarpoq taamaammat Kalaallit Nunaannut soqutiginninneq assut nuannerpoq.
Kalaallit sinnerlugit Danmarkimit Nunatsinniillu aallartitat 70-it suliffeqarfinnit 36-neersut saniatigut nunani marlunni ministerit Kunngissarlu Frederik peqataapput, Kunngissallu nittarsaaffiup ammarlugu allunaasaq kipimmagu alutorineqarluarpoq.
AAMMA ATUARUK Kunngissap nunarput soqutigineqarnerulersippaa
Kunngissap peqataanera soqutiginnittoqarnissaanut eqqartuisoqarnissaanullu iluaqutaaginnanngilaq.
- Kunngissap ukioq manna aallartitani peqataanera asseqanngilluinnarpoq. Peqataanera aallartitat iluminni aamma Kalaallit Nunaata Danmarkillu suleqatigiilluarnerannut pitsaasuusoq malugisinnaavara. Aamma nunani allamiut nutaarsiassaqartitsiviini maluginiarneqarpoq aningaasaliisartullu Kunngissap peqataanera maluginiarlugu.
Nittarsaassinermili angusaviit nalilernissaat suli siusippallaartoq, Mads Quistip oqaatigaa.
- Aningaasaliisartut Kalaallit Nunaannut aningaasaliiartulertussappata, taava iluatsitsilluarnerujussuussaaq.
Pingaarnertulli: Danmarkip Kalaallit Nunaatalu akornanni suleqatigiinnermik pitsanngorsaasimavugut? - taamaaliorpugut. Niuerfinnik nutaanik nassaarpugut? Nunanut inunnullu nutaanut Kalaallit Nunaata aatsitassarsiorfiusinnaanera oqaluttuaraarput? - Taamaaliorpugut. Maannamut takusinnaasattut ajunngilluinnarpoq.
